WSLk Donostiako Basque Country Junior Pro bertan behera utzi du, Israel kanpoan uzteko eskaera jaso ondoren

Asteburu honetan Donostian egingo den jaialdi baten barruan, junior mailako surf txapelketa bat ere egitekoak ziren, baina kirolari israeldarren parte-hartzearen aurkako jarrera azaldu ondoren, Association of Surfing Professionals (WSL) elkarteak lehiaketa bertan behera uztea erabaki du.

Erakunde horrek txapelketa bertan behera utzi duela baieztatu du, "jaialdiaren antolatzaileek Israel txapelketan ez egoteko egindako eskakizunak ezin dituelako bete", Waxdayz jaialdiaren antolatzaileak sare sozialetan argitaratu duen mezuan azaldu duenez.

Basque Country Junior Pro txapelketa egiten ez bada ere, jaialdiaren gainerako egitarauari eutsiko zaio, besteak beste, Ozeanoen Munduko Egunaren baitan egingo diren ekintza bereziei.

Instagramen zabaldutako mezuan, antolatzaileek azaldu dute WSLri "adierazpen instituzionalek babestutako proposamena" helarazi diotela, eta horrekin ados daudenez gero, Israelgo surflariak lehiaketatik kanpo utziko dituzte.

"Ahal dugun guztia egingo dugu gainerako kirolariengan eragin ahalik eta txikiena izan dadin, asteburua ederto pasatzeko eta surfaren kulturaz gozatzeko, horretarako baikaude hemen. Waxdayz jaialdiak martxan jarraitzen du, eta Saguesen elkar ikustea espero dugu", nabarmendu dute.

Groseko Indarrak "positibotzat" jo du antolatzaileek emandako pausoa

Bestalde, Groseko Indarra surf talde eta eskolak "positibotzat" jo du jaialdiaren antolatzaileek emandako pausoa, izan ere, WSLri egindako eskakizunekin "bat egiten dute Palestinarekiko elkartasun mugimenduarekin eta Israelek horrelako ekitaldietan parte hartzeari uzteko egindako deialdiarekin".

Gainera, "beste formatu batean eta WSLtik kanpo" surf txapelketa bat antolatzeko prest agertu dira, "balio solidarioekin bat egiten duten surflari guztiek gure babesa merezi baitute".

Azkenik, "antolatzaile, parte-hartzaile eta jarraitzaile guztiak gonbidatu dituzte palestinarrarekiko elkartasun mezuak botatzera, jaialdian zehar".