Zuzenean: Iranek su-etena berretsi eta ukatu egin du su-etenaren ostean Israelen aurka misilak jaurti izana

Irango Segurtasun Nazionalerako Kontseilu Gorenak baieztatu egin du AEBetako presidenteak Israelekin proposatutako su-etena.

Irango telebistak ukatu egin du Israeli misilak jaurti dizkiotela.

"Su-etenaren ostean Irandik misilak jaurti ditugula dioten informazioak faltsuak dira", adierazi du Irango telebistak.

Bere aldetik, Israelgo Armadak jakinarazi du Iranek eraso bat egin duela misilekin Israel iparraldean, Trumpen proposamena onartu ostean.

Israelgo Magen David Adom (MDA) larrialdi zerbitzuak esan du ez dela biktimarik izan erasoaren ostean.

Israelgo komunikabideen arabera, Israelgo hegazkinen aurkako sistemek geldiarazi dute bonbardaketa.

Israelgo hainbat politikarik bonbardeketei erantzutea eskatu dute erasoaren berri izan eta gutxira. "Iran dardarka egongo da", idatzi du sare sozialetan Bezalel Smotrich Finantza ministroak.

Trumpek adierazi du Iran eta Israelen arteko su-etena indarrean dela dagoeneko. Truth Social sarean egin du iragarpena. 

"Mesedez, ez urratu su-etena", eskatu die bi aldeei.

Israelek onartu du su-etena, gobernuak jakinarazi duenez.

AEBko presidenteak esan du Israel eta Iran "ia aldi berean" hurbildu zitzaizkiola bakea eskatzeko.

"Israel eta Iran nigana etorri ziren, ia aldi berean, eta esan zuten: 'BAKEA!'. Ohartu nintzen unea ORAIN zela. Mundua, eta Ekialde Hurbila, benetako IRABAZLEAK dira! Bi nazioek euren etorkizuna MAITASUNEZ, BAKEZ ETA OPAROTASUNEZ beteta ikusiko dute", adierazi du agintariak Truth Social sare sozialean.

Hala ere, Abbas Aragchi Irango Atzerri ministroak esan du ez dagoela "su-etenari buruzko akordiorik" Israelekin, nahiz eta Donald Trump AEBko presidenteak bi herrialdeen arteko "erabateko su-etena" iragarri.

"Oraingoz, ez dago akordiorik su-eten baten edo operazioen etenaldi baten inguruan", adierazi du Aragchik X sare sozialean egindako mezu batean. "Behin eta berriz esan dudan bezala, gerra erregimen israeldarrak hasi zuen, ez guk", gaineratu du.

Iranek Estatu Batuek Qatarren eta Iraken dituzten baseen kontra eraso egin eta ordu gutxira bota du iragarpena Trumpek, asteburuan AEBk Irango programa nuklearreko hiru instalaziotan egindako bonbardaketen erantzun gisa.

Uste dutenez, Iranen kontraerasoa diseinatu zen eskualdean gerra-giroa ez areagotzeko; izan ere, AEBri gaurko erasoaldiaren berri aldez aurretik emateaz gain, Iranek duela egun batzuk ohartarazi zuen AEBk Ekialde Hurbilean base estatubatuarrak bonbardatu zitzakeela, AEBk erasoz gero.

Israelen eta Iranen arteko borrokaldia joan den ekainaren 13an hasi zen, Israelgo Gobernuak Iranen aurkako erasoaldi militarra abiatu zuenean, bere azpiegitura militarrarekin eta uranioa aberasteko azpiegiturarekin amaitzeko helburuz.

Ordutik, Iranek eta Israelek elkarri eraso egin diote droneekin eta misilekin. Erasoen ondorioz, 450 pertsona inguru hil dira Iranen, eta 24 inguru, Israelen. 

"Ezin izango genuen gaurko tratua itxi B-2 bikainen eta operazio horretan parte hartu duten guztien talentu eta ausardiarik gabe. Modu ironiko batean, kolpe perfektu horrek, gaueko azken orduan, guztiak batu zituen, eta tratua itxi egin zen!", adierazi du Trumpek Truth Social sarean.

Mezua agintariak berak Israelek eta Iranek hamabi orduko "erabateko su-etena" lortu dutela adierazi eta ordu batzuetara atera da. Horren ostean, bi herrialdeen arteko gerra "amaitu" dela esan dute. 

"ZORIONAK GUZTIOI! Israelek eta Iranek erabat adostu dute SU-ETEN OSOA izango dela (gutxi gorabehera, sei orduren buruan, bi herrialdeek azken misioak betetakoan), hamabi orduz, eta une horretan gerra BUKATUTZAT joko dela", idatzi du bere sare sozialean.