Trumpek % 30eko muga-zergak iragarri ditu Europar Batasunarentzat, abuztuaren 1etik aurrera

Donald Trump AEBko presidenteak iragarri du % 30eko muga-zergak ezarriko dizkiela Europar Batasuneko produktu guztiei abuztuaren 1etik aurrera.

"2025eko abuztuaren 1etik aurrera, Estatu Batuetara bidalitako EBko produktuen gaineko % 30eko muga-zerga bakarrik kobratuko diogu Europar Batasunari, muga-zerga sektorial guztietatik aparte", jakinarazi du Trumpek Truth Social sare sozialean, Ursula von der Leyen Europako Batzordeko presidenteari zuzendutako gutun bat argitaratuta.

Aurreko egunetan beste herrialde batzuekin egin duen bezala, Trumpek atzera egingo du "Europar Batasunak edo EBko enpresek AEBn produktuak fabrikatzea erabakitzen badute".

"Ahal dugun guztia egingo dugu onarpenak azkar, profesionalki eta errutinaz lortzeko; hau da, asteak igaro baino lehen", idatzi du gutunean, ohiko formatuari jarraituz: EBk, arrazoiren batengatik, muga-zergak handitzea eta errepresaliak hartzea erabakitzen badu, "kopuru bera gehituko diogu % 30 horri". 

Trumpen iragarpenaren berri izan bezain laster, Ursula von der Leyen Europako Batzordeko presidenteak Estatu Batuetako presidenteari berretsi dionez, Brusela prest dago akordio komertzial bat negoziatzeko, nahiz eta "beharrezko" joz gero, errepresalia neurriak hartzeko aukera zabalik utzi duen.

Von der Leyenek, Trumpen gutuna "aintzat hartzen" duela azaldu ondoren, ohartarazi du zerga gehigarri hori ezartzeak "funtsezko hornidura kate transatlantikoak etengo lituzkeela, Atlantikoaren bi aldeetako enpresen, kontsumitzaileen eta pazienteen kaltetan".

Europako Batzordeko presidenteak adierazi duenez, "munduan ekonomia gutxik berdintzen dute Europar Batasunaren bidezko merkataritza praktiken irekitasun eta atxikimendu maila", zeinak "sistematikoki lehenetsi baitu AEBrekin negoziatutako irtenbide bat". Bere ustez, horrek "elkarrizketaren, egonkortasunaren eta elkarte transatlantiko eraikitzaile baten aldeko konpromisoa" islatzen du.

Von der Leyenek azpimarratu duenez, Brusela prest dago "abuztuaren 1a baino lehen akordio bat lortzeko lanean jarraitzeko", baina ohartarazi du bere interesak "babesteko beharrezkoak diren neurri guztiak" ere hartuko dituela, "baita kontraneurri proportzionalak ere, beharrezko ikusiz gero".

"Bitartean, arauetan oinarritutako nazioarteko merkataritzaren printzipioetan sendo errotutata dauden aliantza globalak sakontzen jarraitzen dugu", esan du Von der Leyenek.

% 30ekoak Mexikori ere

EBra bezala, Mexikora ere bidali du gaur mezua Trumpek. AEBko presidenteak Claudia Sheinbaum Mexikoko presidenteari zuzendutako gutun bat argitaratu du eta bertan jasotzen denez, "% 30eko muga-zerga berriak" ezarriko dizkie "AEBra bidalitako produktu mexikarrei, muga-zerga sektorial guztiez gain", abuztuaren 1etik aurrera.

Mandatariak gutunean azaldu duenez, muga-zerga horiek "gorantz edo beherantz" alda daitezke, AEBren eta Mexikoren arteko harremanen arabera.

"Lurra zeharkatu duen jenderik mesprezagarrienaz osatzen diren kartelak eta gure herrialdera datozen drogak ez geldiaraztea" leporatzen dio Trumpek Mexikori.

Halaber, Mexikok errepresaliak hartu eta muga-zergak handitzea erabakitzen badu, AEBek hark erabakitako kopuruari beste % 30 gehituko diola ohartarazi dio. 

Trumpek gutunean adierazi duenez, Mexikok "muga babesten lagundio dio AEBri, baina Mexikok egin duena ez da nahikoa", eta gehiago egin behar du "muga babesteko" eta fentaniloaren droga Estatu Batuetara iristea eragozteko.

"Mexikok kartelei desafio egitea eta fentaniloaren fluxua gelditzea lortzen badu, gutun hau doitzea pentsatuko dugu", idatzi du presidente errepublikanoak. 

Mexikoko Gobernuak AEBrekin "mahai binazional" bat eratu duela iragarri du, eta joan den ostiralean egin dute lehen bilera, aurrez jaso baitzuten zergen iragarpenaren berri. 

"Mahai iraunkor binazionalaren lehen zeregin nagusia lanak gidatzea izango dela adostu zen, data hori (abuztuaren 1a) baino lehen mugaz bi aldeetako enpresak eta enpleguak babestea ahalbidetuko duen alternatiba bat izan dezagun", gaineratu du Gobernuakk X. kontuan argitaratutako ohar batean. Segurtasuna, migrazioa, muga eta uren kudeaketa eta bi herrialdeen arteko harreman ekonomikoa landuko dira, besteak beste.