Alemaniak, Frantziak eta Erresuma Batuak Gazako gerra amaitzeko "ordua" iritsi dela diote

Friedrich Merz Alemaniako kantzilerrak, Emmanuel Macron Frantziako presidenteak eta Keir Starmer Erresuma Batuko lehen ministroak komunikatu bateratu bat argitaratu dute ostiral honetan, eta bertan adierazi dutenez "Gazako gerrari amaiera emateko ordua" iritsi da."Hondamendi humanitarioa" berehala amaitzeko eskatu dute.  

"Su-eten negoziatu bat da aukerarik onena bahituak etxera ekartzeko, familien larritasunari amaiera emateko eta Gazako biztanleria zibilari lasaitua emateko", jakinarazi dute E3 taldeko hiru buruzagiek beren komunikatuan, eta Hamasi eskatu diote bere esku geratzen zaizkien bahitu guztiak askatzeko.

Merz, Starmer eta Macronek Hamasi ohartarazi diote armagabetzea "beharrezkoa" dela, eta ez duela "inolako paperik izan behar Gazaren etorkizunean".

Israeli dagokionez, E3ko buruzagiek "laguntza-fluxuari jarritako oztopoak berehala kentzea" eskatu dute, "NBEk eta GKE humanitarioek goseteari aurre egiteko lana lehenbailehen egin hala izan dezaten" eta, horrela, Isrealek "nazioarteko zuzenbide humanitarioaren arabera dituen betebeharrak" bete ditzan.

"Lurralde palestinar okupatuen gainean Israelen subiranotasuna inposatzeko edozein ahaleginen aurka gaude", gaineratu dute Europako buruzagiek. "Palestinarren aurkako anexio mehatxuek, asentamenduek eta kolonoen indarkeriak bi Estaturen konponbide negoziatuaren aurreikuspenak ahultzen dituzte", esan dute, eta Israelgo Armadari Gazan okupatzen dituen eremuetatik alde egiteko eskatu diote.

"Prest gaude berehalako su-eten bat eta israeldarrentzat, palestinarrentzat eta eskualde osoarentzat segurtasun eta bake iraunkorra ekarriko duen prozesu politiko bat babesteko neurri berriak hartzeko", amaitu dute.

Guterresek ez du ulertzen munduaren "axolagabekeria eta gelditasun maila" 

Hiru liderren iragarpena Antonio Guterres NBEko idazkari nagusiak esan eta ordu batzuetara etorri da. Horrek esan duenez ezin da azaldu "nazioarteko komunitateko eragile gehiegirengan ikusten dugun axolagabekeria eta gelditasun maila", Gazan gertatzen ari den suntsipena, "garai modernoetan ikusi dugun ezer baino harago" doan bitartean.

Amnesty Internationalen batzarrera bidalitako eta NBEk zabaldutako mezu batean, Guterresek esan du ez duela ulertzen Gazako nazioarteko komunitatearen pasibotasun hori islatzen duen "erruki, egia eta gizatasun falta".

"Entzuten ari gara haurrak zerura joatea nahiago dutela esanez, han behintzat zer jan izango dutelako", azaldu du idazkari nagusiak.

"Heroien pareko diren gure langileek pentsatu ezinezko baldintzetan jarraitzen dute lanean. Batzuk hain daude leher eginda, hain minduta, ez baitira sentitzen ez bizirik ez hilik. Bideokonferentzia batzuetan (ikusten ditugu) gure begien aurrean nola ahitzen diren", gaineratu du.

"Ez da soilik krisi humanitario bat: kontzientzia globala bera zalantzan jartzen duen krisi morala da", azpimarratu du Guterresek, eta horretaz hitz egiteko eskubidea aldarrikatu du, "aukera den bakoitzean", nahiz eta aitortu duen hitzek ez dituztela elikatzen "goseak dauden haurrak".

Guterresek maiz hitz egin du Gazako gerrari eta Israelen gehiegikeriei buruz, gobernu hebrearrarekin etsaitzeraino. Israelek Guterresekin ez ezik, Nazio Batuen agentzia askorekin eten ditu komunikazioak, partzialtasunez jokatzea eta sistematikoki Israelen aurka lerrokatzea leporatzen baitie.