Hildakoak 60.000tik gora dira dagoeneko Gazan eta gosetea gizarte osora zabaltzen ari da

2023ko udazkenetik Israel Gazaren aurka egiten ari den erasoaldiak egoera benetan lazgarriak utzi ditu. Antonio Guterres NBEren idazkari nagusiaren hitzetan, Gazako Zerrendak "hondamendi humanitario epikoa" bizi du. Hildakoak 60 mila baino gehiago dira dagoeneko, eta herritarren herenak gosete egoeran daude. Bitartean, nazioarteko presioa areagotzen ari da, Erresuma Batuak Palestinako Estatua onartu egindo duela iragarri du eta.

2023ko urriaren 7ko erasoen ostean Israelek hasi zuen erasoaldiak utzitako hildakoen eta zaurituen kopuruaren berri emateko azken datuak plazaratu ditu Gazako Osasun Ministerioak. Zehazki, 60.034 dira hildakoak; 113, azken 24 orduetan.

Ministerioak nabarmendu duenez, astelehenetik asteartera bitartean,Israelgo tropek gutxienez 22 pertsona tirokatu dituzte laguntza humanitarioa lortzen saiatzen ari zirenean.

Beraz, maiatzaren amaieran AEBk eta Israelek babestutako Gazarako Fundazio Humanitarioa (GHF) Gazan lanean hasi zenetik, Israelgo Armadak 1.179 pertsona hil ditu tirokatuta, janaria jasotzeko zain zeudela.

Kopuruak gehiago zehazteko, agintariek azpimarratu dute 8.867 pertsona hil eta 33.829 zauritu dituztela martxoaren 18a ezkero, Israelgo Armadak Hamasekin urtarrilean hitzartutako su-etena hautsi zuenetik, alegia.

Hala ere, kopurua handiagoa izango ote den beldur dira, bilaketa- eta erreskate-taldeak ezin baitira iritsi hainbat eremutara.

NBEk gosete arrisku larriaz ohartarazi du

Erasoez gain, azken hilabeteetan gosetea ari da Gaza suntsitzen. NBEko agentziek ohartarazi dutenez, hiru biztanletik batek baino gehiagok hainbat egun ematen ditu jan gabe. Jakinarazi dute, halaber, beste nutrizio-adierazleak ere mailarik txarrenera iritsi direla.

Gazako Osasun Ministerioak emandako datuen arabera, elikagai faltagatik 150 lagun hil dira dagoeneko; horietatik 88, haurrak.

Horrez gainera, NBEren arabera, "500.000 pertsonak baino gehiago (Gazako biztanleriaren ia laurdena) gosetearen antzeko egoeran daude, eta gainerako biztanleek, berriz, muturreko goseari aurre egin behar diote".

Haurren egoerari begiratuta, NBEk nabarmendu du 320.000 haur baino gehiagok (5 urtetik beherako biztanle guztiak) desnutrizio akutua izateko arriskua dutela. Horietatik milaka haurrek desnutrizio akutu larria dute, desnutrizio modu hilgarriena, alegia.

Ekainean 6.500 haur ospitaleratu zituzten desnutrizio-tratamendua jasotzeko (gatazka hasi zenetik izan den kopururik handiena). Uztailean, ordea, kopuru hori are handiagoa izan da: lehen bi asteetan 5.000 adingabe baino gehiago ospitaleratu baitzituzten.

"Denbora agortzen ari da"

Nazio Batuen Elikagaien Munduko Programak (WFP) eta Nazio Batuen Haurren Laguntzarako Funtsak (UNICEF) ohartarazi dute "denbora agortzen" ari dela "eskala handiko erantzun humanitarioa ezartzeko".

Ross Smith WFPren zuzendariak esan duenez, laguntza humanitarioa sartzeko gerra-etenaldiak ez dira nahikoak. "Ez dira betetzen ari laguntza humanitarioko beharrezko bolumenak, eta elikagaiak ez ezik, osasun- eta mediku-hornidura eta ura ere sartu beharko lirateke".

"Beharrezkoa da azkarrago ematea sartzeko baimenak, soldaduak ez egotea konboietatik eta banaketa-puntuetatik gertu, eta, jakina, zain dagoen jendeari tiro ez egitea", gaineratu du.

Era berean, gogorarazi du martxoan amaitu zen su-etenaldian, egunean 200 kamioi eramatea eta 400 puntutan baino gehiagotan laguntza banatzea lortu zutela.

Agentziek zehaztu dutenez, "Gazan elikagaien eta nutrizioaren oinarrizko beharrak asetzeko soilik, hilero-hilero 62.000 tona bizi-laguntza baino gehiago behar dira".