Erresuma Batuak iragarri du Estatu palestinarra irailean onartuko duela, Israelek baldintza batzuk betetzen ez baditu

Erresuma Batuko Gobernuak irailean onartuko du Palestinako Estatua, NBEren Batzar Nagusia egin aurretik, Israelek baldintza batzuk betetzen ez baditu, besteak beste, "Gazako hondamendiarekin" amaitzeko urratsak ematea, su-etena ezartzea eta Zisjordania ez anexionatzea.

Ministroen Kontseiluak egin duen premiazko bileraren ondotik, Keir Starmer Erresuma Batuko lehen ministroak Israeli eskatu dio epe luzerako bake prozesu batekin konpromisoa har dezala, bi estaturen konponbidea bideratzeko.

"Erresuma Batuak Palestinako Estatua onartuko du Nazio Batuen Batzar Nagusiaren aurrean, irailean, Israelgo Gobernuak Gazako egoera lazgarriari amaiera emateko funtsezko neurriak hartzen ez baditu, su-etena adosten ez badu eta epe luzera bake iraunkorra lortzeko konpromisoa hartzen ez badu, bi estaturen konponbidearen ikuspegia berpiztuz", adierazi du Starmerrek.

Era berean, "NBEk laguntza ematen jarraitzea eta argi uztea Zisjordanian ez dela anexiorik egongo", eskatu du Erresuma Batuko lehen ministroak. "Su-eten horrek iraunkorra izan behar du, eta bake egitasmo zabalago bati bide eman behar dio, nazioarteko bazkideekin martxan jartzen ari garena", esan du.

Starmerrek ziurtatu du "bizitza osorako geratuko zaizkigun irudiak" ikusten ari direla Gazan, eta horregatik "sufrimendua eteteko" eskatu die Israelgo agintariei.

"Gutxienez 500 kamioi (laguntzarekin) ikusi behar ditugu egunero Gazan sartzen", azpimarratu du, astelehenean Donald Trump AEBko presidentearekin Eskozian egoera humanitarioari buruz hitz egin zuela azaldu ostean.

Aldi berean, bi estatuen helburua "inoiz ez bezala presiopean" dagoela eta konponbide hori "mehatxupean" dagoela onartu du.

Era berean, "Hamaseko terroristei" mezu bat bidali die, eta armagabetzeko, su-etenarekin bat egiteko eta "Gazan etorkizuneko edozein gobernutan paperik ezingo duela bete onartzeko" deia egin die.

Diputatu laboristen heren batek baino gehiagok eta bere Gobernuko kide batzuek, hala nola Osasun ministro Wes Streetingek, publikoki Palestinako Estatua onartzeko eskatu ondoren iritsi da Starmerren erabakia.

Downing Streeten aurrean gaur egindako protesta batean, dozenaka manifestarik Starmerri eskatu diote ez dezala gehiago atzeratu eta Palestinako Estatua lehenbailehen onar dezala, eta presio handiagoa egin diezaiola Israeli, Gazako palestinarren aurkako erasoak gelditu ditzan.

Emmanuel Macron Frantziako presidenteak iragan astean iragarri zuen Frantziak irailean NBEren Batzar Nagusian Palestina estatu gisa onartuko duela, "Ekialde Hurbilean bake justu eta iraunkorra lortzeko konpromiso historikoari leial", neurri hori hartu berri duten mendebaldeko beste estatu batzuekin bat eginez, Espainiarekin adibidez.