Abbasek Israelen "genozidioa" salatu du NBEn, baina esan du Hamasek ez duela Gazan lekurik izango

Mahmoud Abbass Palestinako Aginte Nazionaleko presidenteak "genozidiotzat" jo du Nazio Batuen Erakundearen batzar orokorrean Israel Gazan eta Zisjordanian egiten ari dena. Gazako sarraskia ez dela "eraso hutsa" salatu du, bideokonfereziaz egin duen hitzaldian, AEBk New Yorkera bidaiatzeko bisatua debekatu ziotelako

Israelen ekintzak "gerra krimen" eta "gizateriaren aurkako krimen" gisa deskribatu ditu eta "gizartearen kontzientzia komunean errejistratu eta grabatuta geratuko" direla adierazi du. "Gazan bi milioi pertsona gosez hiltzeko arriskuan daude", esan du, eta hori "XXI. mendeko kapitulurik tragikoenetako bat bezala gogoratuko da", gehitu du.

Halaber, deitoratu egin du Benjamin Netanyahu Israelgo lehen ministroak hedapen asmoekin jarraitzea, "ez bakarrik Gaza eta Zisjordaniaren kontura, baita eskualdeko beste herrialde arabiar batzuen kontura ere", argitu du. Baina argi utzi du palestinarrak ez direla beren lurraldetik joango. "Ez dute bizitzeko eta bizirauteko dugun borondatea hautsiko", esan du.

Hala ere, Hamasek 2023ko urriaren 7an egindako atentatuak errefusatzen dituela nabarmendu du Abbasek. "Ekintza horiek ez dute herri palestinarra ordezkatzen, ezta haren borroka ere", esan du, eta bahituak askatzea eskatu du.

Abbasen ustez Hamasek ez du lekurik izango etorkizunean Gazan. Lurralde hori "Palestinako Estatuaren zati" dela aldarrikatu du eta gobernantza bere gain hartzeko prest azaldu da. "Hamasek armak utzi beharko ditu", esan du.

Gazarako plana

Palestinako Aginte Nazionaleko presidenteak Gazan herrialde arabiarren eta nazioartearen laguntzaren arituko den aldi baterako administrazio batzorde bat ezartzearen aldeko apustua egin du, "barne arazoak kudeatuko" dituena. Gatazka amaitu eta urtebetera, hauteskundeak egitea proposatu du eta Konstituzio proiektu bat egiteko erantzukizunaz aritu da. "Estatu demokratikoa izatea nahi dugu, modernoa, Nazioarteko Zuzenbidearen eta multilateralismoaren mende egongo dena; armarik eta estremismorik izango ez duena", nabarmendu du.

"Munduko gainerako herriekin aske bizi nahi dugu, estatu independente eta subirano batean, 1967a baino lehenagoko mugekin, Jerusalem Ekialdea hiriburutzat hartuta", ziurtatu du.

Bestalde, Nazio Batuen Erakundean Palestinari buruzko "mila ebazpen baino gehiago" onartu direla baina eraginik ez dutela izan salatu du. "Israelgo Estatua onartu genuen. Ahalegin guztiak egin genituen Israelekin bakean eta segurtasunean biziko zen Estatu baten erakundeak ezartzeko, baina Israelek ez zituen errespetatu sinatutako akordioak, eta sistematikoki lan egin du horiekin amaitzeko ", esan du.

"Gogorarazten dizuet 1988an, baita 1993an ere, Israelen existitzeko eskubidea onartu eta berretsi genuela. Eta hori egiten jarraitzen dugu", errepikatu du.

Ildo horretan, eskerrak eman dizkie Palestinako Estatua onartu berri duten herrialdeei eta laster egiteko asmoa dutenei. Esker oneko hitzak ere izan ditu urte hauetan zehar kausa palestinarra bere egin duten elkartasun adierazpen guztiekiko, eta babes hori antisemitismoarekin parekatzea arbuiatu du.