Lau lagun atxilotu eta hainbat zauritu dituzte Flotillako euskal ekintzaileei egindako harreran izan diren istiluetan

Istiluak izan dira larunbat eguerdian Loiuko aireportuan, Gazara laguntza zeraman Global Sumud Flotillan parte hartzeagatik Israelek atxilotutako euskal ekintzaileak iritsi direnean. Istilu horietan, hainbat pertsona zauritu ditu Ertzaintzak, eta lau eraman dituzte atxilo (guztiak aske daude dagoeneko).

Hartara, ekitaldi bat izan behar zena, istilu larri bilakatu da. Izan ere, ekintzaileak hegazkinetik jaitsi berriak zirela, oso segundo gutxian eta inork espero ez zuenean, egoera nahastu eta istiluak sortu dira Ertzaintzarekin. Agenteek borrekin kolpatu dituzte ekintzaileak.

Horren aurrean, barkamena eskatu du Segurtasun Sailak arratsaldean, eta esan du ikerketa jarri duela abian gertatutakoa argitze aldera. 

14:00ak jotzeko minutu gutxi falta zirenean iritsi dira Loiura Turkiatik abiatu diren ekintzaileak.

Aireportura harrera egitera joan diren lagunak eta senideak 11:00etatik zeuden bertan haien zain. Global Sumud Flotillako ekintzaileak atzo ziren iristekoak Loiura, baina bidaia atzeratu behar izan zuten Israelgo indarrek atxikitako ekintzaileetako bi ospitalera eraman behar izan zituztelako, jasandako torturak tarteko.

Lau atxilotu

Loiun izandako istiluetan lau lagun atxilotu dituzte, desobedientzia larria eta agenteei jarkitzea egotzita.

Segurtasun Sailak jakitera eman duenez, Ertzaintzak barne ikerketa abiatu du agenteek behar bezala jardun duten argitzeko.

Ekintzaileetako batek Ertzaintzaren partetik jaso duten tratua salatu du ETBko mikrofonoen aurrean, eta ez dagoela horretarako eskubiderik adierazi du. "Ospakizun une bat kaka bihurtu dute. Israelen aldetik jaso dugun tratuaren ondoren, Ertzaintzaren kolpeak iritsi dira", kritikatu du.

Gaitzespen irmoak eta protestak

Gaur arratsaldean protesta egin dute Deustuko ertzain etxearen aurrean, lau ekintzaile atxilotu izana salatzeko. Txalo zaparrada batekin eta aurreskua dantzatuta egin diete harrera atxilotuei, aske utzi dituztenean.

Biharko (igandea) ere deitu dute manifestazioa. Bilboko Moyua plazatik abiatuta, protesta ekitaldia egingo dute, 13:00ean, "Ertzaintza eta Eusko Jaurlaritza Israelen konplize. Sionismoa suntsitu, Palestina askatu" lelopean.

Bestalde, EH Bilduk, Sumarrek eta Podemos Euskadik gertatutakoa gaitzetsi dute, eta Segurtasun sailburuaren berehalako agerraldia eskatu dute.

Bere aldetik, Zupiria Segurtasun sailburuak iragarri du asteartean emango dituela azalpenak, Legebiltzarrean.

Global Sumud Flotillak gaitzetsi egin du gertatutakoa

Global Sumud Flotillak ohar bat zabaldu du Loiuko gertakariak gaitzetsi eta Ertzaintzaren jarreraren aurrean bere haserrea adierazteko. "Agenteek berehala erantzun dute, modu oso bortitzean", salatu dute oharrean.

"Lasaitasuna eta kontsolamendua emateko unea izan behar zena esperientzia lazgarria izan da, Ertzaintzaren basakeriagatik. Atzo bertan alta jaso zuten lagun batzuk daude gaur zauritu dituztenen artean; hau da, Israelgo agintarien jipoien ostean Ertzaintzarenak iritsi dira", azaldu dute.

Flotillako kide guztiak Bilbora eta Bartzelonara itzuli dira

Hogei bat ekintzailek hartu dute parte Global Sumud Flotilllan, eta dagoeneko etxera bueltan dira guztiak.

Gazako Zerrendan Israelek atxiki eta bost egunera, 12:00 eta 12:30 bitartean heldu dira Bilbora eta Bartzelonara ekintzaile guztiak.

Munduko beste hainbat aireportutan ere harrerak egin dizkiete flotilletako kideei, Grezian, Herbeheeretan eta Hegoafrikan, kasu. 

Ongietorri guztietan salatu dute Israelek flotilletako kideak torturatu dituela. "Tratu basatia, umiliazioak eta jazarpen sexuala", esan dute malko artean Gazara bidaia egin duten kideetako batzuek.

Ospitalera eraman behar izan dituzte beste batzuk, jasotako kolpeen ondorioz. Hala et aguztiz ere, argi utzi ditu palestinar presoak direla ankerkeria bortitzena bizi dutenak.

Horregatik, gobernuei eskatu diete apur ditzatela Israelekin dituzten harremanak. Espainiako Kultura ministro Ernest Urtasunek, Bartzelonako Aireportutik, Fiskaltzari eskatu dio iker ditzala tratu txar horiek.

Bien bitartean, italiar ekintzaileek Israelgo agintariei leporatu diete indarkeria erabili izana.