Pertsona bat hil da eta 780 baino gehiago atxilotu dituzte Frantzian, PSGk Txapeldunen Liga irabazi ostean izandako istiluetan

24 urteko motozale bat hil da larunbat iluntzean Parisen, PSGren Txapeldunen Ligako ospakizunetan, hormigoizko bloke batzuen aurka aurrez aurre talka eginda, Porte Maillot parean. Gainera, beste bi pertsona larri zauritu dira Paris mendebaldean izandako liskarretan.

Horrez gain, gutxienez 780 pertsona atxilotu dituzte Frantzian, herrialdeko hainbat tokitan izandako istiluetan, Paris Saint-Germain (PSG) taldeak Arsenalen aurka Txapeldunen Ligako finala irabazi ostean. Liskar ugari izan dira gau osoan, batez ere Frantziako hiriburuan, eta 283 pertsona atxilotu dituzte. 

Milaka zale kalera atera dira Parisko taldeak Arsenalen aurka Budapesten jokatutako finalean lortutako garaipena ospatzeko. Alabaina, sute, ekintza bandaliko eta Poliziarekin liskar ugari izan dira gauean Frantziako hainbat tokitan, eta gutxienez zazpi agente zauritu dira. Parisen egin dituzte atxiloketa gehienak.

Ordu batzuk lehenago, Frantziako agintariek jakitera eman dute 336 pertsona atxilotu dituztela Frantzia osoan, gehienak (235) hiriburuan. Parisko Poliziaren Prefekturak emandako azken balantzearen arabera, istiluak hasi orduko segurtasun-indarrek dozenaka pertsona atxilotu dituzte hiriburuan.

Eliseoko Zelaietan 20.000 pertsona bildu dira, Poliziak jendetza kontrolatzeko operatibo handia martxan zuen bitartean. Barbès eta Strasbourg–Saint-Denis auzoetan ere jende asko bildu da.

Testuinguru horretan, gutxienez zazpi agente zauritu dira, horietako bat larri, Garona ibaiaren ertzean dagoen Agen hirian izandako liskarretan.

Halaber, kiosko bati su eman diote eta hainbat ibilgailu kaltetu dira. Hainbat pertsona Parisko VIII. barrutiko polizia-etxe batera heltzen saiatu dira,  baina segurtasun-indarrek sakabanatu egin dituzte.

Agintarien esanetan, Porte Maillot aldean dagoen ingurabidea jendeak hartu du; izan ere, dozenaka pertsona bertan sartu dira, eta hainbat merkataritza-establezimenduren eta hiri-altzariren aurkako ekintza bandalikoak izan dira hiriko hainbat tokitan.

Istiluak ez dira Parisen bakarrik gertatu. Frantziako beste herri batzuetan ere, Grenoblen eta Tolosan esaterako, liskarrak izan dira. Suziriak jaurti eta kalte materialak eragin dituzte hainbat dendatako erakusleihoetan. Frantziako Barne Ministerioaren arabera, suteak eta arpilaketak izan dira Frantziako hamabost bat hiritan.