Donostia 2016ren inauguraziora bertaratzen direnentzako gomendioak

Iritsi da eguna. Donostiak Europako Kultur Hiriburutzako inaugurazio ekitaldi nagusia egingo du gaur arratsaldean eta Udalak hainbat gomendio eman ditu bertaratuko den jende oldea aurreikusita. Bi ekitaldi nagusi izango dira; 18:00etatik aurrera abiatuko da ekitaldi instituzionala eta bi ordu geroago, 20:00etatik aurrera izango da inaugurazio ekitaldia, Hansel Cerezak zuzendutako ikuskizuna, hain zuzen. Elkarbizitzaren zubia izeneko ikuskizuna gidatu du Cerezak eta 50.000 ikuslek bertatik bertara jarraitzea aurreikusten dute antolatzaileek.

Ahal izanez gero, garraio publikoa erabiltzeko gomendatu du Udalak, eta autoz eginez gero, erdigunetik kanpo edo bide nagusiak oztopatzen ez duten lekuetan uzteko eskatu du. Halaber, irteerak zein diren informatzeko eskatu die herritarrei.

Taldeka joaten direnei eskatu die jendetza dagoen tokira sartu aurretik bilera gune bat adosteko eta, haurrekin joanez gero, eskutik ondo heltzea edo besotan eramatea. “Haur txikiak ondo identifikatuta izatea komeni da, galduz gero gurasoekin harremanetan jartzeko telefono bat idatzita eramatea gomendatzen dugu”. Halere, norbait galduz gero, larrialdi zerbitzuetara jotzeko gomendatu du Donostiako Udalak.

Leku berean luze egoteko asmoa dutenei hidratatzeko eta egonkor ez dauden tokietara ez igotzeko eskatu die herritarrei. Halaber, segurtasun indarrek ezarritako hesiak ez igarotzeko gomendatu du.

“Alkohola edo drogak hartu duenarekin tentuz ibiltzeko” eta, istilurik izanez gero, segurtasun langileei horren berri emateko gomendatu du Udalak. Pertsonen segurtasunari kalte egin ahal dion material piroteknikoa edo arriskutsua ez erabiltzeko eskatu dute antolatzaileek eta, edozein larrialdi izanez gero, 112 telefonora deitu edo segurtasun beharginei jakinaren gainean jartzeko gogoratu dute.

Lekuren bat hustu behar izanez gero, “lasai egoteko, eta azkar, baina korrika egin gabe, eta antolatzaileen gomendioak jarraituta ibiltzeko” gomendatu dute.