Horrelakoa da “Ilargi guztiak” filma
Hilabete barru, otsailaren 19an, estreinatuko da, dena ondo bidean (eta askotxo da, egun, hori esatea), “Ilargi guztiak”, Igor Legarreta zinemagilearen (Leioa, 1973) bigarren film luzea. Betiko bizitzera kondenatutako neskato baten (Haizea Carneros) inguruko alegia fantastikoa da, eta Itziar Ituño eta Josean Bengoetxea aktoreak ditu protagonista.
“Nire pertsonaia emakume misteriotsua da, haren izena ez da esaten pelikula osoan”, azaldu du Ituñok. “Ilunpetik datorren izaki bat da, betiko bizi dena. Egun batean, neskato bat ikusi, eta amatasuna piztuko zaio. Itzalpean bizi den emakume onbera iruditzen zait, triste samarra eta heriotzaren beldur dena benetan”.
Itziar Ituño ("Ilargi guztiak")
“Oso giro ona izan dugu filmatzen ari ginela”, azaldu digu Ituñok, “batik bat lankideon artean”. “Igorrekin lan egitea oso erraza da. Oso argi azaltzen du zer nahi duen eta zein neurritan nahi duen”, adierazi du.
EITBren parte-hartzea duen filmean lan egiteak ahogozo atsegina utzi dio Igor Legarreta zuzendariari ere, Ituñorekin (“Goenkale”, “Alardea”, “La casa de papel”, “Hil kanpaiak”, “Loreak”…) lan egitea “oso erraza” iruditu baitzaio: “Oinak lurrean ditu. Eta Josean ere nahi nuenerako hor neukala sentitu dut. Konfiantza mota hori dagoenean, zure zalantzak beraiekin parteka ditzakezu eta emaitza aberasten duen eztabaida bat sortzen da. Atsegin dut jendea gustura izatea eta, ahal den neurrian, pelikula filmatzen disfrutatzea”.
Igor Legarreta (ezkerra), "Ilargi guztiak" filmatzen
“Ilargi guztiak” euskaraz filmatu dute, eta, Legarretak dioenez, ez da beldurrezko filma, ezpada “kontakizun erromantiko bat. Bizirauteko, arrastoa uzteko, gure desirari buruzko hausnarketa proposatzen duen fantasiazko drama da, erlijioek fedeari emandako bizitza baten truke agintzen duten altxor baliotsu horren inguruko istorioa. Iruñean ezarritako bizkaitar zinemagilearen bigarren film luzea da, "Cuando dejes de quererme"ren ondoren.
Josean Bengoetxea aktoreak (“Ander”, “Loreak”, “Errementari”, “Hil kanpaiak”…) gorpuzten duen pertsonaiari buruz esan digunez: “Nik pertsona ontzat daukat Candido, nire pertsonaia, eta horretan oinarrituta landu dut. Oso gizarte itxian bizi den norbait da: bakarrik dago, emaztea eta alaba galdu ditu. Pelikula bukatu zenean, erabat hutsik sentitu nintzen. Eta aktore bezala, agortuta gelditzea da gerta dakizukeen onena”.
Haizea Carneros eta Josean Benegoetxea ("Ilargi guztiak")
“Oso gustuko ditut Igorrek ematen dituen jarraibideak”, erantsi du Bengoetxeak, “erakusten ari zarenarekin lotuta egoten baitira. Dena kontrolpean izaten saiatzen da, baina tartea egiten die emozioei, eta azkenean hori da ikuslea harrapatzen duena”.
“Ilargi guztiak”, minaren aurreko beldurrari eta hilezkortasunari buruzko hausnarketa proposatzen duen filma, otsailaren 19an estreinatzea aurreikusi dute.
Zure interesekoa izan daiteke
Brigitte Bardot aktore frantziarra hil da, 91 urte zituela
Aktore eta abeslaria Frantziako zinemaren ikonoa eta 1950eko eta 1960ko hamarkadetako ikur erotikoa izan zen.
“Salitre” Nagore Aranburu protagonista duen pelikula filmatzen bukatu dute
Norma Vila bilbotarraren lehen film luzea “ama-alaba batzuen arteko harremanaren kontakizun makurra da, drama intimoaren eta beldur psikologiko eta fisikoaren artean mugitzen dena”.
Honelakoa da "Aro berria", zinemetan ikusgai den Irati Gorostidiren filma
Aro berria EITBren parte-hartzea duen filma bigarren astea egiten ari da zinema aretoetan; Irati Gorostidiren filma Gasteizen, Bilbon, Bermeon, Galdakaon, Donostian, Errenterian, Irunen, Altsasun eta Iruñean dago ikusgai. Donostiako Zinemaldiko New Directors sailean aipamen berezia jaso zuen filmaren sekuentzia bat aurreratzen dizugu Orainen, primizian.
EZAEk Zinemaren Euskal Festa ospatuko du larunbat honetan
Ekimenak publikoarekin loturak indartzea eta zinema-aretoen balio kulturalaren aitortza bultzatzea du helburu. Sarrera guztiak 3 euroko prezio sinbolikoan eskainiko dira.
Ikusi primizian "El mal" Bajo Ulloaren film berriaren trailerra
EITBren parte hartzea duen filmean, inoizko hiltzaile handienari buruzko liburu bat idazteko proposamena jasoko duen kazetari baten istorioa kontatzen du Juanma Bajo Ulloa zinemagile gasteiztarrak.
Odola! Odol gehiago!
Telebista-emankizun batentzako kamerak har dezaken horretatik harago doaz beti Albert Serraren eta Imanol Rayoren objektiboak, errealitateak ezkutatzen duen ‘egia’ horren bila. Eta ez egia biribila, osoa, aldaezina den hori, baizik eta gauzen, gizakion, bizidunen, momentuen esentzia dardartia gordetzen duena.
Oscarren banaketa ekitaldia Youtuben ikusi ahal izango da 2029tik aurrera
Hollywoodeko Akademiaren eta bideo plataformaren arteko akordioa 2033ra artekoa da gutxienez.
"Las hijas" filmaren grabaketan izan gara, Urduñan
Urduñan (Bizkaia), Las hijas filmatzen ari dira, EITBk parte hartzen duen pelikula. Emakumeak protagonista dituen thriller psikologikoa da eta hausnarketa sakona egitera gonbidatuko gaitu. Bost aste daramatzate grabazioak egiten, eta filmaketaren azken egunetan daude; beraz, laster ikusiko dugu pantaila handian.
Rob Reiner aktore eta zine zuzendaria eta Michele Singer haren emaztea hilda aurkitu dituzte Los Angelesen
Los Angeleseko Polizia ustezko homizidio gisa ikertzen ari da gertaturikoa.
'Los domingos' eta Jose Ramon Soroiz garaile Forque sarietan, Goyen atarian
Donostian Urrezko Maskorra eskuratu ostean, Alauda Ruiz de Azuaren filmak irabazi du larunbat honetan fikziozko film luze onenaren saria. Patricia Lopez Arnaizek eta Soroizek eskuratu dituzte aktore onenen golardoak.