"20.000 especies de abejas": izena, izana eta ezina
Gizartearen berbaroa, esana edo oihua entzun, asimilatu eta hausnarketa horren emaitza jendartera itzuli, oihartzuna lortu eta hartzaileak mugiarazteko, ahal dela mezu hori jantzi eder, hunkigarri eta zintzoan bilduta. Hori da, gutxi-asko, artista zintzoaren jarduna, eta horretan dirau Estibaliz Urresola laudioar zinemagileak, "20.000 especies de abejas" Berlinaleko Sail Ofizialean estreinatu duen filmean ere.
"Cuerdas" film labur arrakastasuan erakutsitako konpromiso sozialaren lorratzari jarraitu dio Urresolak bere lehen film luzean, eta, Ekai ondarroar nerabearen suizidioak xaxatuta (filma idazteko pizgarria hori izan zela esan digu zuzendariak), adingabe transexualen gaia jorratzen duen pelikula eder, zirraragarri eta erztuna ondu du.
Lucia zortzi urteko umea ez da eroso sentitzen ingurukoek Aitor izenez deitzen diotenean, eta ezinegon horrek bere burua birkokatzeko (agian, "besteak bere aurrean ondo kokatzeko" esan beharko genuke halakoetan, egiari zor) eta bere izana dagokion gisan izendatzeko bidaia batera bultzatuko du uda batez, ze, "Irati" Paul Urkijok estreinatu berri duen filmean esaten den bezala, "izena duen guztia bada", izan. Eta baden orok ere izen egokia behar du.
Berriz ere, "Cuerdas"en bezala (pelikula horretako aktore ez-profesionalei keinu ere egiten zaie honakoan), aktore profesionalak eta ez-profesionalak (umeak, kasu honetan) uztartu ditu Urresolak kameraren aurrean, aldez edo moldez patriarkatuak jotako emakumeak modu zoragarrian hezurmamitzeko: Lucía umearen adierazkortasun zintzo eta dirdiratsua (Sofia Otero), Ane amaren (Patricia Lopez Arnaiz) barne ekaitz halabeharrez isildu baina ez baretua (kapitalismoaren inertziak urgentea lehenestera bultzatzen gaitu, garrantzitsuaren aurretik), Lita amamaren (Itziar Lazkano) zurruntasuna eta Lourdes izeba zaharraren (Ane Gabarain) amultsutasuna.
Erlezaintzak bustitako pelikula izanik, badu gozotik filmak (bi umeren arteko bainujantzi trukearen sekuentzia aratz eta hunkigarria, adibidez, gogoan iltzatuta gelditzen da), baina baita garratzetik ere, erlijioaren zamak eta gizonen nagusikeriak (aitaren arrasto sakon eta samingarri hori, Anerengan eta Litarengan) zenbaiten bizitzetan zein bide estua utzi duen erakusten duenez gero.
Hala ere, bitasun eta ziurtasunak horretan gelditzen dira, baita umearen amamak eta izeba zaharrak ordezkatzen dituzten mundu ikuskera antagonikoetan ere agian, baina filmak, oro har, urtu egiten ditu mugak, nola geografikoak (Ipar Euskal Herritik Hego Euskal Herrira egiten dute protagonistek), hala hizkuntzarenak (euskara, gaztelania eta frantsesa entzuten dira), eta, esan gabe doa, baita generoen artekoak ere.
Bidaia baten kronika barik, bidaia askoren kronika da "20.000 especies de abejas", zorionez; besteren begirada oker eta mingarriek itotako izaki baten istorioa barik, gainerakoen begirada okerra kokatzen duen eta aberasten duen iragaite mingarri baten istorioa. Eta helduleku berri bat, mundu berri eta hobe baterako.
Bihurtuko ahal da, zauri baten kontakizuna barik, zarakar baten lekukotasuna!
Zure interesekoa izan daiteke
Petrus me fecit, Helena lapidem meum reflexa est
Zorteak zera eman dio Petrus zinema piezari: testura ezberdin bat, bene-benetakoa, plantak egiten ez dituena.
"Ander eta Yul" filma zaharberritu dute EITBk eta Euskadiko Filmategiak
Ana Diez zuzendari nafarraren Ander eta Yul (1988) filma zaharberritu dute Euskadiko Filmategiak eta EITBk. Boloniako Zinematekaren menpeko L’Immagine Ritrovata laborategietan aztertu eta eskuz konpondu dute, aurretik, besteak beste, Tasio filmarekin egin zen moduan
Oliver Laxek instalazio bat erakutsiko du Tabakaleran
"HU/هُو.Bailad como si nadie os viera" instalazioak Sirāt filmaren sorkuntza prozesua, ikerketa lana eta grabazioak ditu oinarri. Uztailaren 16an aurkeztuko du Laxek bera, Donostian.
Nouvelles Vagues jaialdiak izarren dirdira piztuko du Biarritzen
Biarrizko zinema jaialdiaren 4. edizioa ekainaren 23tik 28ra egingo dute kostaldeko hirian. Kristen Stewart zuzendari eta aktorea izango da epaimahaiko burua, eta Los Javisek, Xavier Dolanek, Monica Belluccik, Marion Cotillardek eta Isabelle Huppertek parte hartuko dute.
Zinegoak LGTBQ+ jaialdiak 40 film baino gehiago izango ditu Sail Ofizialean
Ekainaren 22tik 29ra bitartean egingo den Zinegoak Bilboko LGTBIQ+ zinema eta arte eszenikoen jaialdiak 40 film baino gehiago izango ditu Sail Ofizialean. Gainera, kulturarekin eta sexu-, identitate- eta genero-aniztasunarekin lotutako 50 jarduera baino gehiagorekin beteko du Bilbao.
Zinemaren Jaia, Hegoaldeko zinema aretoetan bueltan
Ekainaren 8tik 11ra, 3,5 eurokoa izango da zinemarako sarreren prezioa. Ipar Euskal Herrian, Fête du Cinéma ekainaren 28tik uztailaren 1era izango da.
Aurtengo Kimuak katalogoko film laburrak aukeratu dituzte
Zazpi film labur hauek hautatu dituzte euskal film laburrak sustatu eta zabaltzeko: ‘Aho beltza' (Alba Lozano), 'Al otro lado' (Pablo Esteo, June San Sebastián, Leyre Fernández, Antton Gorroño, Leire Martínez, Irune Aguirreazaldegui eta Javier Martínez), 'Bitartean, gero' (Raúl Barreras), 'Hemen gaude' (Sébastien Boulard), 'High River' (Daniel Alegrete), 'Joare Tte' (Ekaitz Bertiz) eta 'Los Divulgators' (Pablo Hernando Esquisabel).
“Tamara ta Mara” euskarazko fikziozko telesail berria estreinatu dute Primeran plataforman
“Tamara ta Mara” umorez beteriko euskarazko fikziozko telesaila da, komedia zoro eta feminista bat. EITBren ‘Formatu txikiak, Talentu berriak’ deialdiaren barruan garatu den bigarren telesaila da. Bilboko Azkuna Zentroan estreinatu ostean, Primeran plataforman dago jada ikusgai.
Cannes, ispilu beltz murgiltzailean
Eta zeren bitartez sorgintzen gaituzte Carltonen Méliès aztiaren ondorengo sortzaile-teknologoek? Errealitate birtualarekin, errealitate areagotuarekin, erreala ez den errealitatearekin, errealitate mistoarekin, existitzen ez diren arren gure begi betaurrekodunen aurrean forma hartzen duten ikuskizun paregabeekin.
Zinemaldiko kartel berriek zinemako zenbait ogibide dituzte protagonista gisa
Ricardo Darin aktore, ekoizle eta zuzendaria izango da Donostiako Zinemaldiaren 74. edizioko kartel ofizialaren protagonista. Jaialdia 2026ko irailaren 18tik 26ra bitarte egingo da. Kartelak Donostiako Wallijai estudioak diseinatu ditu. Darin protagonista den kartelaren kasuan, collagea sortu dute 2024an hartutako erretratu batetik abiatuta. Poster ofizialarekin batera, gainerako sekzioetako kartelak ere eman dira ezagutzera, zinemagintzako ogibideei omenaldi egin nahian. Hala, Darinen irudia duen posterrak interpretaziora garamatza, eta gainerakoek, berriz, honako hauekin dute zerikusia: gidoia (New Directors), soinua (Horizontes Latinos), zuzendaritza (Zabaltegi-Tabakalera), muntaia (Perlak), arte-zuzendaritza (Nest), makillajea (Culinary Zinema), efektu bereziak (Zinemira) eta ekoizpena (Made in Spain). Kartel horiei Klasikoak ekimeneko hiru kartelak gehituko zaizkie laster. Aurten, Jose Giovanni zinegile, eleberrigile eta gidoilari frantsesa omeduko dute hiru kartel horien bidez.