Maialen Beloki izango da Donostiako Zinemaldiaren zuzendaria 2027tik aurrera

Maialen Beloki (Donostia, 1983) Zinemaldiaren zuzendaria izango da 2027ko urtarriletik aurrera, erakundearen Administrazio Kontseiluak hala erabakita.

Astelehen arratsaldean Donostian egindako ezohiko bileran, Kontseiluak aho batez erabaki du Jose Luis Rebordinos nork ordezkatuko duen, eta horixe izan da horretarako deitutako lehiaketa publikoaren emaitza.

Rebordinos 2011z geroztik da Zinemaldiaren zuzendaria, eta 2026ko abenduaren 31n utziko du kargua. 

Zinemaldiaren zuzendariorde da 2016tik

Beloki Zinemaldiaren zuzendariordeetako bat da 2016az geroztik, eta funtsezko eginkizuna izan du jaialdiaren azken urteotako bilakaeran, bai nazioartera begira, bai urte osoko jardueraren garapenean.

Testuinguru horretan, urte osoko jaialdi baten eredua bultzatu du; izan ere, ekimen estrategikoa da hori talentu berrien garapenerako, prestakuntza zinematografikorako eta zinemaren inguruko pentsamendua sortzeko.

Ikus-entzunezko Komunikazioan lizentziatua da Nafarroako Unibertsitatean, eta Zinema Teoria, Analisi eta Dokumentazioan doktorea (cum laude) Euskal Herriko Unibertsitatean (EHU).

Bere ibilbideak kultura-kudeaketa, irakaskuntza eta ikerketa uztartzen ditu.

Elias Querejeta Zine Eskolako Zuzendaritza Akademikoaren parte da, eta bertan irakasle ere bada; Mondragon Unibertsitatean ere aritu da irakasle.

Bere ibilbidean zehar, proiektu estrategikoetan parte hartu du, hala nola Donostia 2016 Europako Kultur Hiriburuan, eta jarduera nabarmena garatu du hizlari eta egile gisa zinema arloan.

Halaber, ikus-entzunezko sektorea bultzatzeko hainbat programa eta ekimenetan parte hartu du, ICAArekin lankidetzan, besteak beste.

Bera izendatzeak “ikuspegi estrategikoa, sektorearen ezagutza eta kultura garatzeko konpromisoa uztartzen dituen profila baten aldeko apustua” indartzen duela nabarmendu du Zinemaldiak.