“Ehun metro”, “Zergatik panpox”, “Hamaseigarrenean aidanez” eta “Oraingoz izen gabe” zaharberrituko dituzte

Hamaseigarrenean, aidanez (Anjel Lertxundi, 1985), Ehun metro (Alfonso Ungría, 1985), Zergatik panpox (Xabier Elorriaga, 1985) eta Oraingoz izen gabe (José Julián Bakedano, 1986) euskarazko film ertainak Donostiako Zinemaldian ikusiko dira irailean, Eusko Jaurlaritzak, Euskadiko Filmategiaren eta EITBren bitartez, zaharberritu eta gero.

80.000 euroko aurrekontua bideratu du Jaurlaritzak helburu honetarako, eta Boloniako L’Immagine Ritrovata laborategietan egiten ari dira. Hain zuzen ere, uztail hasieran Italiara joango dira euskal literaturaren hiru klasikotan (Hamaseigarrenean, aidanez Anjel Lertxundiren eleberria, Ehun metro Ramon Saizarbitoriarena eta Zergatik panpox Arantxa Urretabizkaiarena) eta Atxagak Borgesen ipuin batean inspiratuta idatzitako gidoian (Oraingoz izen gabe) oinarritutako pelikulen zuzendariak, zaharberritze lanak gainbegiratzera.

Irailean, Donostiako Zinemaldiko Klasikoak sailean emango dira lau lanok, eta EITBk Itzalak argitzen dokumentalean (Berde Produkzioak eta Koldo Almandoz) jasoko du pelikulen errehabilitazio prozesua.

Lanak zaharberritzeko, Espainiako Filmategian eta Euskadiko Filmategian gordeta dauden 35 mm-ko jatorrizko negatiboak erabiliko dira, Euskadiko Filmategitik azaldu dutenez: “Lehenik, material fotokimikoa garbitu egingo da, eta mekanikoki prestatu, digitalizatzeko. Bigarren fasean, denboraren joanak eragindako inperfekzioak desagerraraziko dira, betiere jatorrizko fitxategiaren benetakotasunari eusteko asmoz. Gero, kolorea eta soinua zuzenduko dira. Abuztuan amaituko dira lanak, eta Filmategiko teknikariek gainbegiratuta eta Eusko Jaurlaritzaren babespean gauzatuko dira”.

Filmen fitxak:

EHUN METRO

Zuzendaritza: Alfonso Ungría

Urtea: 1985

Iraupena: 55’

Ekoizpena: Irati Filmak SA / José Luis García Arrojo

Interpretazioa: Patxi Bisquert, Carlos Zabala, Klara Badiola, Aritz Sarria, Paco Sagarzazu, Joseba Apaolaza, Ramón Aguirre, Enrique Salaberria, Ramón Barea, Santiago Burutxaga, Ramón Balenciaga, Luis A. García, José María Txukarro, Gabriel Begiristáin

Gidoia: Alfonso Ungría

Argazkilaritza: Ángel Luis Fernández

Muntaketa: Juan Ignacio San Mateo

Musika: Juan José García Caffi

Zuzendaritza artistikoa: Joseba Garmendia

Zuzendaritza-laguntzailea: José Ramos Paino

Makillajea: Eva Maria Alfonso, Karmele Soler

Sinopsia: Hirurogeita hamarreko hamarkadaren hasiera. Uda. Goizeko zortziak dira. Ion, ETAko militante bat, korrika doa, etsi-etsian, Donostiako Parte Zaharrean barrena; atzetik segika du polizia. Hiria esnatzen ari da, eta normaltasunez ekin dio egunari. Ihesi doan bitartean, Ionek bere bizitzaren historia ere aztertzen du. Eskolan, bere nortasunari uko egiteko eskatzen zioten. Oroitzapen horiek aitaren begiradarekin eta Madeleineren gorpuzkerarekin txandakatzen dira.

HAMASEIGARRENEAN, AIDANEZ

Zuzendaritza: Anjel Lertxundi

Urtea: 1985

Iraupena: 56’

Ekoizpena: Irati Filmak SA / José Luis García Arrajo, Jesús Acín

Interpretazioa: Felipe Barandiaran, Kontxu Odriozola, Mikel Garmendia, Esther Remiro, Pilar Lerma, Xabier Auzmendi, Kontxa Carmona, José L. Castañares, Federico Santalla, Ana Miranda, Mikel Aizpurua, Lourdes González

Gidoia: Anjel Lertxundi

Argazkilaritza: Ángel Luis Fernández

Muntaketa: Juan Ignacio San Mateo

Musika: Ángel Illarramendi

Zuzendaritza artistikoa: Joseba Garmendia

ZERGATIK PANPOX

Zuzendaritza: Xabier Elorriaga

Urtea: 1985

Iraupena: 55’

Ekoizpena: Irati Filmak SA / José Luis García Arrojo

Interpretazioa: Arantza Rentería, Juan María Segues, Igor Mendoza, Aizpea Goenaga, Elena Irureta, Idoia Arrizabalaga, Arantxa Urretabizkaia, Zuriñe Uriarte

Gidoia: Xabier Elorriaga

Argazkilaritza: Hans Burmann

Muntaketa: Juan Ignacio San Mateo

Musika: Amaia Zubiria, Pascal Gaigne

Zuzendaritza artistikoa: Joseba Garmendia

Soinua: José Ángel Pérez

Makillajea: Eva Alfonso, Karmele Soler

Zuzendaritza-laguntzailea: José Ramos Paino

ORAINGOZ IZEN GABE

Zuzendaritza: José Julián Bakedano

Urtea: 1986

Iraupena: 44’

Ekoizpena: José Julián Bakedano, Iñaki Aizpurua

Interpretazioa: Iro Landaluze, Félix Arkarazo, Elene Lizarralde, Eguzki, Luis Iriondo, Eskarne Aroma

Gidoia: Bernardo Atxaga

Argazkilaritza: Gabriel Beristain

Muntaketa: José Luis Berlanga

Musika: Antton Valverde, Peer Raben

Soinua: Matthew Launay