Euskal zinemak Zinemaldian presentzia indartu du 31 ekoizpenekin; 20k EITBren parte hartzea dute

Euskal zinemak presentzia nabarmena izango du Donostiako Zinemaldiaren 74. edizioan, jaialdiaren hainbat ataletan izango diren 31 ekoizpenekin; 20k EITBren parte hartzea dute. 26 film luze, film labur bat, film ertain bat, bi telesail eta produkzio fasean dagoen proiektu bat daude egitarauan, baita euskararen eta euskal emakume zuzendarien ordezkaritza zabala ere.

EITBk lagundutako ekoizpenen artean nabarmentzekoak dira Koldo Almandozen Azken agurra eta David Perez Sañudoren Sacamantecas, Sail Ofizialean. Zabaltegi-Tabakaleran, berriz, Oskar Alegriaren Hamalau gau izango da ikusgai; eta Zinemiran, besteak beste, Igor Legarretaren Inurri itsuak; Gorka Bilbaoren eta Koldo Almandozen Itzalak argitzen; Nytia Lopez Saituaren Simulacro; Elsa Oliarj-Inesen Txakun txakür; Izaskun Arandiaren Irailak; Alejandro Cortesen La maleta de Alex; Maite Ibañezen Pedro Arrupe. Yo viví la bomba atómica; Jabi Elortegiren Gatibu, agur esan barik; David Tabernaren eta Iñigo Puertaren Izarrak; Arantxa Aguirreren Un tal Karlos; eta Beñat Beitiaren eta Elio Quirogaren Winnipeg. El barco de la esperanza.

31 euskal ekoizpen Zinemaldian

Euskal ordezkaritza jaialdiaren ia atal guztietara hedatzen da, hautatutako 31 lanetatik 19k Euskal Zinemaren Irizar Saria eskuratzeko lehian parte hartuko dute, eta 13k euskara dute jatorrizko hizkuntza. Gainera, emakumeek zuzendu dituzte 10 ekoizpen, guztira 37 egilek osatutako multzoan.

Sail Ofizialean, Azken agurra, Sacamantecas eta Daniel Monzonen Ruega por nosotras izango dira; New Directors atalean, Javier Ginerren Esta soledad proiektatuko dute; eta Zabaltegi-Tabakaleran, berriz, Oskar Alegriaren Hamalau gau, Tsai Ming-Liangen Weichten (Dust) filmarekin batera.

Zinemiran, euskal ekoizpenaren zati handi bat bilduko da, hauek izango baitira bertan ikusgai: Inurri itsuak; Itzalak argitzen; Simulacro; Txakun txakür; Irailak; La maleta de Alex; Pedro Arrupe; Yo viví la bomba atómica; Gatibu, agur esan barik; Izarrak; Un tal Karlos; Winnipeg, el barco de la esperanza; Las hijas del mar eta 300 haritz, besteak beste.

Euskal ordezkaritza ere izango da Culinary Zineman, Subijana, más allá de un bigote lanarekin; Belodromoan, Karateka, Go!azen 13 eta Muguruza FM 40 Tour filmekin; Klasikoak atalean, Ander eta Yul lanarekin; eta galetan, Burundanga eta Odol ilargia filmekin. Horiez gain, Ainhoa Alzibarrek eta Beatriz Nietok egindako Ondarea. Euskal sukaldaritza berriak, 50 urte lana ere izango da Jatorria: Euskadi atalaren barruan.

EITBren parte hartzea duten ekoizpenen estreinaldiak

Estreinaldien egutegia irailaren 18an hasiko da, Igor Legarretaren Inurri itsuak filmarekin, Zinemira atalean. Hurrengo egunean Simulacro eta Itzalak argitzen estreinatuko dira; irailaren 20an, berriz, La maleta de Álex, Gatibu, agur esan barik eta Izarrak lanak iritsiko dira, baita Hamalau gau ere, Zabaltegin.

Irailaren 21ean David Perez Sañudoren Sacamantecas izango da protagonista, RTVEren eta EITBren gala bateratuan egingo duten proiekzio berezian, Victoria Eugenia antzokian.

Irailaren 23an estreinaldi ugari bilduko dira: Odol ilargia, Txakun txakür, Padre Arrupe. Yo viví la bomba atómica, Muguruza FM 40 Tour eta Ondarea. Euskal sukaldaritza berriak, 50 urte, baita Koldo Almandozen Azken agurra ere, Sail Ofizialean. Subijana, más allá de un bigote eta Winnipeg. El barco de la esperanza estreinatuko dira hurrengo egunean. Irailaren 25ean, Go!azen 13 iritsiko da Belodromora, Arantxa Aguirreren Un tal Karlos lanarekin batera.

Halaber, ostiral honetan jakin denez, Zinemaldiak eta EPE-IBAIA produkzio-etxeen elkarteak ematen duten ohorezko saria, Zinemira saria, Jose Ramon Soroiz aktorearentzat izango da aurten. Euskal zinemagintzako aurpegi errespetatuenetako bat Soroiz, besteak beste, 'Maspalomas' filmeko protagonista.