Euskal zinemaren pelikula nabarmenak Zinemaldian
Guztira 31 euskal ekoizpenek parte hartuko dute Zinemaldiaren 74. edizioko sail ezberdinetan, eta horietatik 19 Euskal Zinemaren Irizar Saria irabazteko lehiatuko dira.
'Azken agurra' filma. Argazkia: Zinemaldia
Zinemaldiak formatu desberdinetako 31 euskal ekoizpen aukeratu ditu aurtengo jaialdirako.
Azken agurra
Zuzendaria: Koldo Almandoz.
Sail Ofiziala (Lehiaketatik kanpo). Euskal Zinemaren Irizar Saria irabazteko lehian.
Antzezleak: Iñigo Azpitarte, Izaro Nieto, Josean Bengoetxea eta Iñaki Beraetxe.
Hileta laikoen enpresa baten jabea zarenean. Mozkortuta gidatzeagatik gidabaimena kendu dizutenean. Praktiketako ikasle gazteago batekin maitemintzen zarenean. Zure alaba konturatzen hasten denean ez zarela berak uste zuen aita. Dirua eskatu zenion boxeolari erretiratua zure atzetik dabilenean. Heriotza bizitza baino gehiago interesatzen zaizunean... Zer atera daiteke gaizki?
Inurri itsuak
Zuzendaria: Igor Legarreta.
Zinemira. Euskal Zinemaren Irizar Saria irabazteko lehian.
Antzezleak: Urko Olazabal, Itziar Ituño, Josean Bengoetxea, Miren Gaztañaga, Carlos Santos, Unax Hayden, Patxi Bisquert, Daniel Cabrera, Kimetz Etxabe, Markel Coco, Anuk Puertolas eta Elena Uriz.
Bizkaia, 1930. Denborale gogor batek barruan ikatz tonak zeramatzan itsasontzi ingeles bat hondarrarazi zuen. Gauez, Algortako bizilagunak kostan pilatzen dira urre beltza erreskatatzeko. Sabas Jaureguik zorte-kolpe bat bezala ikusten du; Josefak, bere emazteak, iragarpen txar bat bezala. Bere erreguei jaramonik egin gabe, Sabasek ekaitzera eramaten ditu seme-alabak. Familiak pentsaezina egingo du negutik salba edo betiko kondenatu zitzakeen ikatza babesteko.
Odol ilargia
Seriea. EITB Gala.
Zuzendaria: David R. Losada.
Antzezleak: Jon Muñoz, Aritz Kortabarria, Nekane Otxoa, Aitor Borobia, Iraia Elias, Nerea Sanz, Sambou Diaby, Itziar de Castro, Lier Alava, Iñigo Aranburu, Asier Valdesilla, Barbara Rivas eta Miriam Cabeza.
10 urte geroago, institutuko ikasle ohien festa batek Julen eta bere ikaskide ohi batzuk elkartuko ditu berriro. Gogo barik joango da, eta Melyssarekin batera, lagun bakarra izango du, hainbeste denbora geroago. Baina, ikaskide guztien artean, Ibai da aurkitzea espero ez den bakarra, bere haurtzaroko lagun handia izan zena eta, gaur bertan, kartzelatik irten berria dena. Hain zuzen ere, duela hamar urte, Ibaik hilketa bat egin zuen, eta ez zuen inoiz horren azalpenik eman nahi izan.
Simulazioa
Zuzendaria: Nitya López Saitua.
Zinemira. Euskal Zinemaren Irizar Saria irabazteko lehian.
Antzezleak: Iraia Elias, Miguel Garces eta Nitya Lopez Saitua.
Zuzendari bat haurtzaroko etxera itzuliko da, lau urte zituenean gurasoen haustura eragin zuen eztabaida aktoreekin birsortzeko. Inprobisazioaren eta artifizio propioa agerian uzten duen filmaketaren bidez, inoiz usatu gabeko oroitzapenak eraikiko ditu. Alabaina, eszena errepikatu ahala, jarraibideak ezegonkortu eta berritzearen eta desiraren arteko muga lausotzen hasiko da.
Irailak
Zuzendaria: Izaskun Arandia Galarraga.
Zinemira. Euskal Zinemaren Irizar Saria irabazteko lehian.
"1935eko amaieran, Miguel Bargak —nire birraitonak— familia Tolosan utzi eta jaioterrira itzuli zen, Burgosera. Familiari jakinarazi zioten Miguel gerran hil zela. Miguelen gorpua ez zen inoiz itzuli. Birraitonaren heriotza tabu familiarra izan zen hainbat hamarkadatan; alabaina, 2018an Gogora Institutuaren DNA programak haren gorpuzkiak identifikatu eta datu asko ezagutu genituen, bi galdera garrantzitsu erantzun gabe geratu baziren ere: zergatik joan zen hara eta zergatik hil zuten" (Izaskun Arandia).
Txakun txakür
Zuzendaria: Elsa Oliarj-Ines.
Zinemira. Euskal Zinemaren Irizar Saria irabazteko lehian
Inork ez du gogoratzen bere lehen jolasaldia eskolan. Egun hartan ez zegoen heldurik. Ni jolastokian nintzen. Zortzi urtean haur talde bera filmatu nuen, neure buruari galdezka: nola hazten gara besteen begiradapean? Urteak igaro ahala, jolastokiko jokoak rol-joko bihurtu ziren; "jada ez zara nire laguna" jokoak "zu ez zara jolastuko" joko bihurtu ziren. Egun batean berandu iritsi nintzen. Oihuen ondoren, Elise nola jotzen zuten ikusi nuen. Nola ez nintzen lehenago konturatu?
Zure interesekoa izan daiteke
Euskal zinemak Zinemaldian presentzia indartu du 31 ekoizpenekin; 20k EITBren parte hartzea dute
Azken agurra, Sacamantecas, Hamalau gau, Inurri itsuak eta Muguruza FM 40 Tour filmen estreinaldiek markatuko dute euskal ikus-entzunezkoen presentzia 2026ko Zinemaldian. Gainera, Jose Ramon Soroiz aktoreak jasoko du Zinemira Saria.
'Azken agurra'ren lehen irudiak: Koldo Almandozen film berriaren trailerra estreinatu dugu
Euskaraz filmatutako dramedia existentzialistak bizitza eta heriotza ditu ardatz, ironia, samurtasuna eta umorea uztartuz. Iñigo Azpitarte eta Izaro Nieto dira protagonistak, hileta zibilak antolatzen dituen enpresa baten jabea eta bertan praktikak egiten dituen gaztea hurrenez hurren. 'Azken agurra' Zinemaldiko Sail Ofizialean, Proiekzio Berezien barruan, aurkeztuko da, eta Koldo Almandozen hirugarren film luzea da, Sipo Phantasma eta Oreina lanen ondoren. Garabi Films eta Txintxua Films ekoiztetxeen koprodukzioa da, Frakasa Films AIEren bitartez, eta Eusko Jaurlaritzaren, Gipuzkoako Foru Aldundiaren, EITBren babesa eta partaidetza izan du.
Euskal Terrorea, Zinemaldiaz haratago
Culinary Zinemak lau mundu-estreinaldi izango ditu, eta Andaluziako, Mallorcako eta Japoniako sukaldeetara bidaiatuko du
Pelikulak ikusteko eta afarietarako txartelak ostiral honetan, abuztuaren 28an, jarriko dira salgai, goizeko 10:00etan, ohiko bideen bitartez.
Zinemaldiak "Subijana, más allá de un bigote" estreinatuko du, sukaldaritzako maisuaren bizitzara eta suetara hurbiltzeko lana
Jorge Fernandez Mayoralen eta Jesus Javier Ruiz Aquerretaren ez-fikziozko lan berria Donostiako Zinemaldian aurkeztuko dute, Culinary Zinema sailaren barruan. Subijana, más allá de un bigote izenburupean eta EITBren parte-hartzearekin, Pedro Subijana sukaldari gipuzkoarraren kontakizun intimo eta pertsonala eskaintzen du filmak; gure gastronomiaren eraldaketa eta modernizazio handian funtsezko irudia eta Euskal Sukaldaritza Berriaren bultzatzaile nagusietako bat izan denaren erretratua, hain zuzen ere. Gainera, dokumentala euskal zinemaren Irizar sarirako hautagaia ere izango da jaialdian.
Ricardo Darin, Zinemaldiaren 74. edizioko karteleko protagonista, Donostiara itzuliko da
Darin protagonista duen Lo dejamos acá filma zine-jaialdiaren programan sartzea aktoreari omenaldia egiteko modua da; 2017an Donostia Saria jaso zuen.
Brad Pittek Donostia bisitatuko du berriro ere Zinemaldiaren 74. edizioan
Aktore estatubatuarra Gipuzkoako hiriburuan izango da Heart of the Beast filmarekin; Sail Ofizialean proiektatuko da, lehiaketatik kanpo.
100 urte, Rodolfo Valentino Hollywoodeko lehen izar handia hil zela
100 urte bete dira gair Rodolfo Valentino hil zela, Hollywoodeko lehen izar handitzat hartzen dena. Arrakasta handia lortu zuen italiarrak eta oso gazte, 31 urterekin hil zen. Bere heriotzak inoiz ikusi gabeko fenomenoa eragin zuen: 100.000 pertsona baino gehiago bildu ziren hiletan, eta miresleen artean suizidioak ere izan zirela zabaldu zen.
21 film ariko dira 74. Zinemaldiko Zabaltegi-Tabakalera Saria irabazteko lehian
Maria Alche eta Benjamin Naishtaten 'Pedro en el país' filmak emango dio hasiera sekzioari, eta Isaki Lacuestaren 'Jaleos' filmak itxiko du. 13 film luze, 7 labur eta film ertain bat borrokatuko dira saria eskuratzeko, eta ikus-entzunezko performance bat izango da lehiaketatik kanpo, Albertina Carri zinemagile eta idazlearen eskutik.