Uribetxebarria auziaren kronologia

Josu Uribetxebarria Bolinaga ETAko presoa hil egin da gaur goizaldean, minbiziak jota. Honako hauek dira auziaren data nagusiak:

2005 urtea

- Apirila: Minbizia atzeman zioten Josu Uribetxebarriari, giltzurrun batean. Puerto II (Cadiz) espetxean zegoen preso une horretan.

2012 urtea

- Abuztuak 1: Espetxe Zuzendaritza Nagusiak Josu Uribetxebarria Leongo kartzelako osasun zentro batetik Donostiako Ospitalera eramatea erabaki zuen.

- Abuztuak 8: Presoak gose greba hasi zuen aske uztea eta kartzelatik kanpo tratatua izatea eskatzeko. Espainiako eta Frantziako kartzeletako 30 bat presok bat egin zuten baraualdiarekin.

- Abuztuak 9: Barne Ministerioak azaldu zuenez, Uribetxebarriak ez zuen parte hartzen bere egoera zein zen jakiteko frogetan. Ondorioz, kasuaren inguruko edozein erabaki hartzeko oinarria izatea "zaila" zen.

- Abuztuak 13: Uribetxebarriak froga medikuak egitea onartu zuen, eta, horren ostean, auzitegiko medikuek gaixotasun sendaezina duela egiaztatu zuten.

- Abuztuak 17: Espetxe Zuzendaritzak 3. gradua eman zion Uribetxebarriari.

- Abuztuak 22: Uribetxebarriak bertan behera utzi zuen gose-greba, hasi eta 15 egunera. Arnaldo Otegi Batasuneko bozeramaile ohiak eta Francisco Mugika Garmendia Pakito ETAko buruzagi historikoak ere berdin egin zuten.

- Abuztuak 27: Auzitegi Nazionaleko Fiskaltza presoari baldintzapeko askatasuna ematearen aurka agertu zen.

- Abuztuak 30: Jose Luis Castro epaileak baldintzapean aske utzi zuen Uribetxebarria.

- Irailak 12: Carmen Baen Auzitegi Nazionaleko medikuak ukatu egin zuen presoaren gaixotasuna sendaezina zela. Egun horretan berta, Uribetxebarria aske geratu zen.

2014 urtea

- Apirilak 3: Ismael Moreno Auzitegi Nazionaleko epaileak Uribetxebarria etxean giltzapetzea agindu zuen, 1986an Antonio Ramos guardia zibila hiltzea egotzita.

- Ekainak 18: Zigor Aretoak baliogabe utzi zuen Moreno epailearen erabakia, "neurrigabea" zela argudiatuta.

2015 urtea

- Urtarrilak 13:  Auzitegi Nazionaleko Fiskaltzak 29 urteko espetxe zigorra eskatu zuen Uribetxebarriarentzat, Antonio Ramos guardia zibilaren hilketagatik.

- Urtarrilak 16: Hil egin da Josu Uribetxebarria, minbiziaren ondorioz.