Bakartxo Tejeria, Eusko Legebiltzarreko presidente berria

Bakartxo Tejeria jeltzalea hautatu dute astearte honetan Eusko Legebiltzarreko presidente, EAJren 27 legebiltzarkideek alde bozkatuta.

Tejeria hautagai bakarra zen, eta bigarren bozketan izendatu dute, gehiengo arruntaz, lehenengoan ez baitu gehiengo osoa lortu.

Hain justu, Eusko Legebiltzarreko presidente kargua duen hirugarren emakumea da, Izaskun Bilbaoren (EAJ) eta Arantza Quirogaren (PP) ostean.

Azkenean, UPyDk ez beste alderdi guztiek ordezkaritza lortu dute Ganberako Mahaian. Hori horrela, Juanjo Agirrezabala (EH Bildu) eta Blanca Roncal (PSE-EE) lehen eta bigarren presidenteordeak izango dira; eta Anton Damborenea (PP) eta Iñigo Iturrate (EAJ) lehen eta bigarren idazkariak.

Eusko Legebiltzarrak hasiera eman dio gaur X. legegintzaldiari. Hurrengo saioa hilaren 27an izango da, eta, egun horretan, Bateraezintasunen Batzordea osatuko dute.

Iñigo Urkullu hurrengo lehendakariaren inbestidura saioa abenduaren 14an izango da seguru aski. Epe arazoak egongo balira, hurrengo astean egingo lukete.

Tejeriaren lehen hitzaldia

Mahaia osatu eta gero, Tejeriak hitza hartu du, eta legegintzaldi honetan "bakea eta normalizazio politikoa" eraikitzeko oinarriak ezarri behar dituztela adierazi du.

Tejeriak ETA gabeko lehen legegintzaldia izango dela eta Ganberan "aukera politiko guztiak" ordezkatuta egongo direla gogorarazi du.

Halaber, egoera ekonomikoa "zaila" dela nabarmendu du, eta, hortaz, "gastua neurtzea", ekonomia sustatzea eta Ongizate Estatua "bermatzea" beharrezkoa dela agertu du. Hori dena "akordio zabalen bitartez" lortu behar dela erantsi du.

'Mahai gaineko arazoei aurre egiteko egoera onean gaude'

Bakartxo Tejeriak EITBko ‘Azpimarra’ saioan esan duenez, "erabaki batzuk hartzeko hautatu gaituzte, aro berri baten aurrean gaude , ETAren mehatxurik gabe".

Tejeriaren hitzetan, "une kritikoetan jendeak ez zaitu barkatzen, jendeak erantzun bat nahi du, eta guk eman egin behar dugu". Halaber, krisitik irteteko garaia dela nabarmendu du.

Biktimei dagokienez, guztiak aitortu behar direla azpimarratu du, eta bakoitzari bere lekua eman behar zaila gaineratu du, hau da, "orain arte egin ez dena". Halaber, legeak betetzeko daudela adierazi du, eta "delitu gogor bat egin duenak ezin du zigorrik gabe gelditu", azaldu du. "Ezinezkoa da batzuentzat zigorrak jartzea, eta beste batzuentzat ez", azpimarratu du. Halere, "gauzak ez dira zuriak edo beltzak", esan du.

Kataluniaren egoeraren harira, Estatu espainiarrak hori lehenago konpondu zezakeela azaldu du, Estatutua onartu zutenean. "Herriari ezin zaio bizkarra era horretan eman, herriari entzun egin behar zaio. Une haietan ez zuten jakin hori egiten", Tejeriaren ustez.

Halaber, Kataluniako prozesuak Euskadin ez ezik gainerako herrialdeetan eragina izango duela azpimarratu du.

EH Bilduren kamisetak eta Isabeel Celaaren 'hanka-sartzea'

Legegintzaldi berriari begira, Eusko Legebiltzarra kolorez aldatu da, literalki. Ohiko berdea ahaztu, eta hormak hondar kolorez margotu dituzte, argitasun handiagoa izateko.

Beste berrikuntza bat bozketa sistema elektroniko berria da.

Bitxikeriei dagokienez, aipatu behar da Adineko Mahaiko presidenteak, Isabel Celaa legebiltzarkide sozialistak, egindako hanka-sartzea. Izan ere, saioan hitza hartu duenean, Gregorio Ordoñez eta Fernando Buesa ETAk hildako legebiltzarkideak gogora ekarri ditu, baina ez du aipatu GALek hildako Santi Brouard HBko legebiltzarkide zena.

EH Bildutik azaldu dutenez, Laura Mintegi koalizio abertzalearen bozeramaileak Celaarekin hitz egin du atseden batean, eta, ondoren, buruzagi sozialistak "barkamena" eskatu eta Brouard ere gogora ekarri du.

Bestalde, EH Bilduk Adineko Mahaian zituen bi legebiltzarkideek, Diana Urreak eta Igor Lopez Muniainek, Gazaren aldeko eta etxegabetzeen aurkako mezuak zituzten kamisetak erakutsi dituzte.

Besteak beste, Juan Jose Ibarretxe lehendakaria; Carlos Urquijo Espainiako Gobernuak EAEn duen ordezkaria; Martin Garitano Gipuzkoako ahaldun nagusia eta Juan Juis Ibarra EAEko Auzitegi Nagusiko presidentea izan dira saioan, gonbidatuen artean.