Goicoecheak deklaratzen jarraituko du, akusazio nagusiak ukatu ostean

Lourdes Goicoechea Nafarroako Gobernuko lehen presidenteorde eta Ekonomia, Ogasun, Industria eta Enplegu kontseilariak atzo ezeztatu egin zituen Idoia Nieves Ogasun zuzendari ohiaren salaketak, eta ukatu egin zituen esku-hartzeak zein faborezko tratua eta isilpeko dokumentazioa eskatu izana.

Nafarroako Parlamentuan abiatutako ikerketa batzordean agerraldia egin zuen atzo Goicoecheak, eta Idoia Nieves Ogasuneko zuzendari ohiak bere kontra egindako salaketen inguruko galderei erantzun zien bertan.

Hiru ordutik gora deklaratzen eman ondoren, bertan behera utzi zuten kontseilariaren agerraldia, eta gaur ekingo diote berriz galdeketari, 10:00etan. Atzoko saioan UPNren, PSNren eta Bilduren galderei bakarrik erantzun zizkien Goicoecheak, eta, beraz, Aralar-NaBairen txandarekin abiatuko dute gaurko saioa. Ondoren, PPNk, Izquierda-Ezkerrak eta Geroa Baik egingo dituzte galderak.

Ordu horretarako zegoen aurreikusita Yolanda Barcina Nafarroako presidentearen agerraldia; ondorioz, 16:00ak arte atzeratu dute.

Bere agerraldian, Goicoecheak ikuskatze-plana eskatu izana ukatu zuen, eta eskaeraren inguruko akusazioak baztertu zituen. Ostiralean Idoia Nieves izan zen ikerketa batzordean azalpenak ematen, eta kontseilariak "esku-sartzeak" egin zituela eta hainbat bezerori faborezko tratua egin ziela salatu zuen.

UPNren galderei erantzunez, Goicoecheak ukatu egin zuen bazkaloste batean eskaera hori egin izana, baita beste uneren batean plana eskatu izana ere. Halaber, Goicoecheak esan zuen "inoiz ez" duela mesedezko traturik eskatu enpresa batentzat.

Bulegoa

Goicoecheak azaldu zuenez, 2011n utzi zuen bere bulego profesionala, politikari ekiteko. Bulegoak enpresa txikiei ematen die zerbitzu, kontabilitate eta zerga kontuetan. Kontseilariak esan zuen bezeroak lankide baten esku utzi zituela eta ordutik ez dela bertara itzuli. Garai bateko bezero batzuekin "adiskidetasun harremana" izaten jarraitzen duela onartu zuen, "baina ez besterik".

CAN Nafarroako Kutxari buruzko dokumentazioa

Halaber, Goicoecheak esan zuen ez ziola Nievesi CANeko kontseilarien ordainsarien inguruko inprimakien berri eskatu, eta "noren esku zeuden" jakitea bakarrik eskatu ziola.

Bestalde, ukatu egin zuen eskaera hori Barcinaren interesek bultzatuta egin izana. "Presidenteak bere buruaren datu pertsonal bat eskatu zidan une zehatz batean, baina ondoren ez zuen eskaera gehiagorik egin. Zehazki, bere ordainsarien datua eskatu zidan, eta zerga aitorpenean begiratzeko esan nion. Dietak itzuli behar zituen unean izan zela uste dut", gaineratu zuen Goicoecheak.

Ikuskaritza Nafarroako Unibertsitatean

Bestalde, Nafarroako Unibertsitateko ikuskaritza "jukutria" zela esan zuela aitortu zuen Ekonomia kontseilariak, baina hori bere "iritzia" dela gaineratu zuen, "ez esku-hartzea".

BEZaren itzultzean atzerapena

Nievesek "zerga irregulartasun" gisa hartu zuen atzerapenaren harian, Goicoecheak esan zuen 2012an "diru-sarrera gutxiago zegoela aurreikuspenen aldean", eta, ondorioz, ordainketa hori atzeratzea erabaki zela, defizit-muga bete ahal izateko. Erabakia "orduko datu guztiak oinarri izanda" hartu zutela gaineratu zuen.

Adierazpena, fiskalaren esku

Goicoechearen deklarazioa fiskalaren esku uztea eskatu zuen PSNk, kontseilariaren jardunean ustezko eragimen-trafiko delitua egon daitekeela agerian uzten duten "zantzu nahikoa" dagoela iritzita.

Asteleheneko deklarazioak

Atzoko saioa luzea izan zen, goizez eta arratsaldez. Goizean, Pedro Ugalde, Juan Franco eta  Maria Jesus Valdemoros izan ziren ikerketa batzordean deklaratzen, eta Gobernuaren jarduna babestu zuten. Arratsaldean, berriz, Manuel Aranaren txanda izan zen, eta hark berretsi egin zuen Idoia Nievesen akusazioen berri bazutela.

Aurretik Juan Franco Nafarroako Gobernuko Aurrekontuen zuzendariak azaldu zuenez, enpresei BEZaren itzulera atzeratzeak "zailtasunak" ekarri zizkien enpresei eta "ez zen inoren gustuko neurria" izan, baina Yolanda Barcinak "txarretan onena" zelako hartu zuen neurri hori.

Francoren arabera, Europak ezarritako defizit-muga "legea zen" eta bete beharra zegoen. Horregatik erabaki omen zuten BEZaren itzulera atzeratzea.

BEZaren inguruko azalpenak eman behar izan zituen Francok Parlamentuko ikerketa batzordean. "Ez Idoia Nievesi ez inori ez zitzaion gustatzen neurria, baina diru-sarreren aurreikuspena jaitsi egin zen eta ez zegoen aukera onik. Beste edozein neurrik ere kaltetuak utziko zituen", adierazi zuen Francok, Barcinak "aukera txarretan onena" hautatu zuela azpimarratu aurretik.

Francok ukatu egin zuen Gobernuak "inori maula egiteko asmoa" izatea neurri horrekin.

Bestalde, Pedro Ugalde Ekonomia idazkari teknikoak ere deklaratu zuen batzordean. Horren iritzian, "logikoa" zen Lourdes Goicoecheak Ogasun arduradunari informazioa eskatzea.

Goicoecheak Nievesi enpresa bat, bezero ohi bat, "ondo tratatzeko" eskatu izanaren inguruan galdetuta, Ugaldek ohartarazi zuen horrek "gertuko bi pertsonaren arteko esaldia" dirudiela eta dokumentazioa emateko "epea luzatzeko eskaria" izan zitekeela, eta hori "ez zait legez kanpokoa iruditzen".

Bilduk enpresa batzuei "mesede" egitea leporatu zion Goicoecheari, eta hori "ustelkeria" dela nabarmendu zuen. Ugaldek, aldiz, ukatu egin zuen egoera berezian dauden enpresa batzuei "mesede" egin izana, baina "tratamendu berezia" eman izan dietela aitortu zuen.

Lurrikara politikoa

Idoia Nievesen salaketak lurrikara politikoa eragin du Nafarroan, eta oposizioaren gehiengoak dimititzea eta hauteskundeak aurreratzea eskatu dio Yolanda Barcina presidenteari.