Ogasunak 70.000 euroko isuna ezarri dio Aznarri

Asteazken honetan argitaratutako albiste batean, OKdiario komunikabide digital espainiarrak dio Ogasun Ministerioak 70.403,96 euroko isuna ezarri diola Jose Maria Aznar Espainiako presidente ohiari. Halaber, aipatu komunikabidearen arabera, 199.052,19 euroko likidazio osagarria ordainarazi diote Aznarri; izan ere, 2011 eta 2012ko ekitaldietan balizko hainbat zerga-irregulartasun antzeman zituzten.

Cristobal Montoro Ogasun eta Administrazio Publikoetako jarduneko ministroak berretsi du bilera izan zuela Aznarrekin 2015eko udazkenean, baina ez du baieztatu balizko isun hori jarri dioten presidente ohiari, eta, berez, aseguratu du ez zutela zerga-konturik hizpide.

Kazetariekin izandako elkarrizketa informal batean, Montorok ez du baieztatu balizko zigorra, baina esan du Aznarrekin bildu zela, udazkenean; OKdiarioren esanetan, bilera tirabiratsua izan zen.

Ogasun Ministroak, ordea, esan du Aznarrekin egin zuen bilera "ohikoa" izan zela, eta politikaz hitz egin zutela, ez Zerga Administrazioko Estatu Agentziaren ikuskapenaz; esan ere esan du ikuskapen hori ez litzakeela batere arraroa izango, kontuan izanik herri-altxorraren beharra dela.

Argi utzi du Ogasunak herritar guztiak ikertzeko gaitasuna duela, berdin dio nor den, eta aitortu du jende askorekin biltzen dela, baina inoiz ez duela hitz egiten, inorekin, zerga-kontu pertsonalen gainean.

Gai "zaharra", "adostasunez itxitakoa", Aznarrengandik gertu dauden iturrien arabera

Presidente ohiarengandik gertu dauden hainbat iturrik Eferi azaldu diotenez, OKdiariok argitaratutako informazioa "zaharra" den gai bati buruzkoa da; izan ere, 2013ko zerga-ekitaldian Ogasunak dokumentazio jakin bat eskatu zuen, 2009 eta 2010eko ekitaldien gainekoa. Iturri horiek diote dokumentazioa helarazi zela eta dena itxi zela, "adostasunez".

Bere alderdiaz, Montorok onartu du gauza batzuk ez zaizkiola PPn, baina nabarmendu du berak lanean jarraitzen duela, "kontuak koadratzeko helburuarekin", Ogasun jarduneko ministro.

Soria eta Panamako paperak

Industria ministro Jose Manuel Soriak Panamako paperekiko erlazioaz galdetu diotenean, Montorok adierazi du handietsi dela gai hori; izan ere, gauza bat da atzerriko enpresa batean agertzea, legezkoa eta ez gaitzesgarria, eta oso bestelakoa da zuriketa-auzi batean murgilduta egotea.

Montoro pozik azaldu da; izan ere, paper hauetan agertu diren hainbat lagunek erregularizatuta zuten Ogasunarekiko harremana, dagoeneko, agiriak argitaratu aurretik.

Deitoratu du, hala ere, nola zerrenda argitaratu duten Zerga Administrazioko Estatu Agentziari ezer esan aurretik; jarduneko ministroak azaldu du denbora eman zaiela zerrendan daudenei euren egoera agintariei ezkutatzeko.

Galdetu ere galdetu diote ea Zerga Administrazioko Estatu Agentziak hartuko duen neurri edo erabakiren bat Mario Conde banku-buru ohiaren aurka; Montorok esan du ez dela administrazio-ekintzarik abiatzerik, kontuan izanik dena dagoela epai-ekimenaren barnean.