Erreferendumaren lege proposamena erregistratu dute JxSi eta CUP taldeek

JxSi eta CUP taldeek gaur erregistratu dute urriaren 1eko erreferendumaren lege proposamena Kataluniako Parlamentuan: independentziari buruzko galdeketa deitzeko, antolatzeko eta egiteko legea da.

Hain zuzen, oporrak hartu aurreko azken lanegunean erregistratu dute legea. Abuztuaren 16an hasiko dira berriro lanean Kataluniako ganberan. Legea erregistratzeak ez du berez ondorio zuzenik, harik eta Parlamentuko Mahaia arau hori tramitatzen hasi arte. Beraz, aurreikuspenen arabera, oporren ondoren hasiko dira legea onartzeko pausoak ematen.

Kataluniako ganberak onartu berri duen araudiaren erreformaren arabera, talde independentistek egun bakar batean onartu dezakete legea. Irailaren 6rako dago deituta legealdi honetako hurrengo osoko bilkura, baina araudiaren arabera, gehiengoa duten taldeek ahalmena dute beharrezkoa irizten diotenean bilkura bat deitzeko.

Bestalde, trantsizio juridikorako legea abuztuaren amaieran aurkeztuko dute JxSi eta CUP taldeek, hasiera batean uztailaren amaieran aurkeztekoak baziren ere.

'Aurrera jarraitzeko konpromisoarekin'

Erregistroaren ostean, Parlamentuan emandako prentsaurreakoan, Lluis Corominas JXSiko presidenteak nabarmendu du lege hori "ezohiko premiaz" izapidetu nahi dutela. Halaber, lege proposamenaren erregistroa Espainiako Gobernuaren azken aurkaratzearen ?erantzuna? dela azaldu du, eta honako hau gaineratu du: "Aurrera jarraitzeko konpromisoarekin gaude; Katalunian demokrazia ez du geldituko ez Rajoyk ezta Auzitegi Konstituzionalak ere".

Corominasek azpimarratu duenez, legediaren erreformak hartzen duen irakurketa bakarra parlamentu autonomikoek eta Diputatuen Kongresuak duten aukera bat da, beraz, Katalunian bertan behera utziz gero, beste ganberetan ere hala egin beharko lukete.

Testuinguru honetan, Gobernuak Konstituzionalari egindako errekurtsoak ez duela ?oinarri juridikorik? nabarmendu du, eta Mariano Rajoyren Gobernuak araudiaren aldaketa ?Kataluniako Parlamentutik datorrelako? bakarrik aurkaratu duela.

Erreferendumaren legea bi talde independistetako diputatu guztiek sinatu dutela azpimarratu du, Mahaiko kideek izan ezik (Carme Forcadell, Lluís Guinó, Anna Sime eta Ramona Barrufet, JxSikoak), haien ?inpartzialtasuna? babesteko.

Espainiako Gobernuaren Errekurtsoa

Kataluniako Parlamentuaren Araudiaren erreformaren aurkako helegitea aztertzeko batzartuko da gaur Auzitegi Konstituzionalaren osoko bilkura.

Urriaren 1ean Katalunian izango den erreferendumerako bidea prestatzea du helburu erreforma horrek. Gauzak horrela, Juan Jose Rivas auzitegiko presidenteak magistratuak deitu ditu 17:30etarako; Espainiako Gobernuak aurkeztutako helegitea onartu ala ez erabakiko dute.

Kataluniako PPren eta Ciudadanosen errekurtsoa

Rajoyren Gobernuak aurkeztutako errekurtso horri beste bat gaineratu behar zaio: gaur goizean Kataluniako PP (PPC) eta Ciudadanos alderdiek modu bateratuan aurkeztu dutena. Izan ere, euren aburuz, aipatu araudiaren erreformaren bidez, erreferenduma defendatzen duten alderdiak "iruzur" egiten, jokoaren arauak aldatzen eta oposizioa "isilarazten" saiatzen ari dira.

PPCko Andrea Levy diputatuak eta Ciudadanoseko Lorena Roldanek aurkeztu dute errekurtso bateratu hori. Hala egingo zutela iragarri zuten joan zen astean, Kataluniako Parlamentuak, deskonexiorako legeen onarpena bermatze aldera, erreforma espres hori egitea onartu ostean.

"Oposizioa isilarazi nahi dute eta ez dute lortuko", adierazi du Andrea LEvyk kazetarien aurrean helegitea aurkeztu eta gero. Ohartarazi duenez, beharrezkoak diren "errekurtso demokratiko guztiak" aurkeztuko dituzte, "independentistek euren legea ezar ez dezaten".

Lorena Roldan ere era berean mintzatu da. Bere esanetan, "oposizioa isiltzeko asmoa duen mozal erreforma" bat da, nahiz eta oposizio horrek "Junts Pel Sí eta CUP alderdiek lortu zituzten botoak baino gehiago dituen".

Levy eta Roldan batera sartu dira Auzitegi Gorenean helegitea aurkezteko.