Romeva: 'Europaren printzipioak mehatxatzen dituztenak akusazioen artean daude'

Europaren printzipioak, hala nola, askatasuna eta berdintasuna, defendatzen dituzten politikariak akusatuen aulkian izatea deitoratu du gaur Raul Romeva Governako Kanpo Ekintza kontseilari ohiak; bitartean balio horiek “mehatxatzen” dituztenak akusazioen artean eserita daude. Romevaren ahotan, horrek “demokratak haserretu beharko lituzke”.

Zentzu horretan, bera bezala Europaren balioak defendatzen dituztenak gaur akusatuen aulkian izatea “kezkagarria” dela uste du Atzerri kontseilari ohiak. Aldi berean, printzipio horiek mehatxatzen dituztenak “akusazioen artean esertzea” kritikatu du Romevak, Voxen herri-akusazioari erreferentzia argia eginez.

“Horrek demokratak haserretu beharko lituzke, ez bakarrik independentistak; bizitzen ari garen errealitate hain paradoxikoa ulertzen zaila da”, gaineratu du.

Proces auziko epaimahaiaren aurrean, Romevak “preso politiko” bezala aurkeztu du bere burua. Horrela, aurretik Oriol Junqueras Generalitateko presidenteorde ohiak egindakoa errepikatu du Romevak, eta ez die Fiskaltzaren galderei erantzun. “Epaiketa politiko baten” aurrean dagoela esan du kontseilari ohiak.

Aulkiko kideek orain arte egin bezala, Kataluniako prozesu soberanistan indarkeriarik erabili ez dutela esan du Romevak, “desiragarria” soilik ez, “benetan zentzuzkoa” ez delako baizik.

Romevaren hitzetan, Governak ez zuen “sekula indarkeria bultzatu”: “Erabat ukatzen dut”. “Errepresioaren aurrean, indarkeriarik ez”, hori izan zen Generalitateak zabaldu zuen “agindu zibiko, politiko eta instituzionala”, kontseilari ohiaren arabera. Ez bakarrik uste ideologikoagatik, “bidezko helburua lortzea errazagoa zelako, mekanismo ez biolentoak erabiliz”, erantsi duenez.

“Indarkeria desiragarria bakarrik ez, guztiz baztertu beharrekoa da, benetan ez delako batere zentzuzkoa”, adierazi du kontseilari ohiak. Romevari 16 urteko espetxe-zigorra ezartzea eskatu dute, matxinada eta diru publikoak bidegabe erabiltzea egotzita.

Romevaren ahotan, “arma bakarrak Guardia Zibilarenak izan dira”. Horregatik, “altxamenduaz hitz egitea kaltegarria da, gertakariek kontrakoa demostratzen dutelako”, gaineratu du.

Atzerri kontseilari ohiaren esanetan, U-1ean indarkeria izan zen, baina Segurtasun Indarren aldetik; justifikaziorik gabe, “gordintasunarekin”, eta herritarren “kalterako” erabili zuten indarkeria. Horren aurrean, herritarrek “erresistentzia baketsuarekin” erantzun zutela goraipatu du Romevak. “Biktima zibil ugari izan ziren, mila bat inguru”, salatu du.

“Ez da herrialde demokratiko baten Polizia demokratiko baten jokabidea”, azaldu du. “Espainiako demokraziaren historian orban handia da”, esan du.

Bestalde, diru publikoak bidegabe erabiltzea leporatzea “eldarnioa” dela uste du Atzerri kontseilari ohiak, Kontseilaritzaren gastu guztiak “legezko ekimenetan” izan direlako.

Romevaren hitzetan, akusazioak zerrendatu dituen gastu gehienak “hitzaldiak, mahai-inguruak…” dira.

“Europako Parlamentuan hitzaldi bat ematea nola izan daiteke legez kontrakoa? Are gutxiago, urraketa bat”, esan du ERCko diputatuak. “Ezkutatzeko ezer ez dut”, azpimarratu du.

Azkenik, Auzitegi Konstituzionalak Kataluniako Estatutuaren inguruan 2010ean hartutako erabakia prozesu soberanistan “une garrantzitsua” izan zela gogorarazi du gaur Romevak, “haustura emozional dramatikoa” izan baitzen.

“Ni 2010era arte, beste asko bezala, ez nintzen independentista, federalista baizik”, azaldu du Romevak.

Bestalde, Parlamentak 2017ko urriaren 27an onartu zuen aldebakarreko independentzia aldarrikapena “borondate politikoaren adierazpen” bat izan zela azaldu du Jordi Turull Presidentetzako kontseilari ohiak, “herriko gehiengoaren iritziaren isla”.

Besteak beste, Jaime Moreno fiskalaren galderei erantzun die kontseilari ohiak. Carles Puigdemonten Governak U-1ko erreferendumaren emaitzak Parlamentera eraman zituela azpimarratu du kontseilari ohiak Gorenean. Ondoren, “adierazpen politiko” bat bozkatu zutela gaineratu du.

Joaquim Forn Barne kontseilari ohiak iragan astean markatutako ildoari heldu dio Turullek. Horrela, 2017ko urriaren 6an, galdeketa egin eta egun batzuk geroago, berak, Oriol Junqueras presidenteorde ohiak eta Raul Romeva Atzerri kontseilari ohiak U-1ko emaitzak Parlamentera eramatea eskatu zutela onartu du.

Turullen ahotan, “zehaztasun juridiko-parlamentarioak alde batera utzita”, independentzia aldarrikapena “borondate politiko baten adierazpena da, herriko gehiagoaren iritziarekin bat”.

“Independentzia adierazpen bat zen? Ez zen bakarrik formala izan?”, galdetu dio fiskalak. “Borondate politiko baten adierazpena” eta “adierazpen politiko” bat dela berretsi du kontseilari ohiak.

Esquadra Mossoek erabaki judizialak ez betetzeko aukera sekula “burutik pasa” ez zitzaiela ziurtatu du Turullek.

Carles Puigdemonten Governa “azken minutura arte” U-1ko erreferenduma Exekutibo zentralarekin “adosten” saiatu zela adierazi du Presidentetzako kontseilari ohiak. Gainera, “erreferendumean eurorik xahutu” ez zutela ziurtatu du.

Epaiketaren bosgarren saioa asteazken honetan, 10:00etan, hasiko da. Rull galdekatuko dute, ondoren Bassa eta Borras.