Erreferendumean herritarrek jarrera baketsua izan zutela adierazi du begirale batek

Bernhard von Grünberg Alemaniako parlamentari ohia Katalunian izan zen 2017ko urriaren batean begirale gisa eta gaur Auzitegi Gorenean deklaratu du lekuko moduan, Kataluniako buruzagi independentisten aurkako epaiketaren baitan.

Erreferenduma ekiditeko Poliziak eta Guardia Zibilak erabilitako indarkeriaren aurrean herritarrek jarrera baketsua izan zutela azpimarratu du.

Espainiako Auzitegi Gorenak erreferenduma galarazi zuela bazekiela esan du, baina bozketa hura "gizarte zibilak" antolatu zuela erabat agerikoa zela erantsi du.

Egun hartan hainbat hauteslekutan izan zen. Poliziak "beldurrarazi eta mehatxu egin arren" herritarrek jarrera baketsuari eutsi ziotela azpimarratu du. "Herritarrengandik ez nuen inolako jarrera oldarkorrik edo indarkeria zantzurik ikusi; alderantziz, lasaitasunari eusteko gai izan ziren eta hori nabarmentzekoa da", azaldu du.

Hauteslekuetara Kataluniako Diplomazia Kontseiluaren ordezkari batek lagunduta joan zirela esan du, baina erakunde horrek erroldarik edo agindurik eman gabe, askatasun osoz ibili zirela zehaztu du.

Ramon Llull ikastetxean, poliziak hauteslekuan indarkeria erabilita sartu zirela kontatu du. Gomazko pilotakadak jaurti eta hainbat herritar zauritu zituztela esan du. Egun guztian zauritutako poliziarik ikusi ez zuela gaineratu du.  

Bestalde, politikari sozialdemokratak argi utzi nahi izan du bidaia ez ziola Kataluniako Gobernuak ordaindu. "Nire bidaiak nik neuk ordaintzen ditut, nire independentzia bermatzeko", adierazi du.

Erreferenduma nola burutzen zen ikusteko joan zirela esan du, baina "hauteskunde-begiraleak" ez zirela zehaztu du, horiek izendatzea Europako Segurtasun eta Lankidetzarako Erakundearen eginkizuna delako. "Alderdikeriak baztertuz, Katalunian irekitako prozesuari buruzko interes politiko eta pertsonalagatik joan ginen”, azpimarratu du. "Gure eginkizuna ez zen bozketa ikuskatzea edo baliozkotzat jotzea", erantsi du.

Erreferenduma bertatik bertara jarraitzeaz gain, bidaia alderdi politikoetako ordezkariekin hitz egiteko baliatu zutela azaldu du. Ildo horretan, alderdi guztiekin izan zirela esan du, tartean PSC, PP eta Ciudadanosekin.

Horrez gain, Jordi Pujolen garaitik Generaliteko presidente guztiak ezagutu dituela kontatu du. Carles Puigdemonten kasuan esan du ez zela independentziaren aldekoa, elkarrizketa babesten zuela, baina ez zela hitz egiteko aukerarik izan. "Nire iritziz, elkarrizketarik ez izatea akats politikoa izan zen", adierazi du. Une horretan Manuel Marchena magistratuak arreta deitu dio, balorazio politikorik egin ez dezala eskatuz.  

Kataluniako buruzagi independentisten aurka Europako beste epaitegi batzuetan irekitako auzietan esan duena errepikatu du: auzipetuek deliturik egin ez dutela eta arazo politikoak demokratikoki konpondu behar direla, eta ez prozesu judizialen bidez.

Bestalde, urriaren 1eko erreferenduma baino lehen Raül Romeva kontseilari kargugabetuarekin eta Carme Forcadellekin harremana izan zuela esan du. Parlamentuan Kataluniako etorkizunari buruzko eztabaida ahalbidetuta, Forcadellek Ganberako presidente gisa dagokion eginkizuna bete zuela erantsi du.