Azpiazu: "Elkarguneak bilatzeko benetako borondatearekin lan egiten denean, lortu egiten da"

Pedro Azpiazu Ekonomia eta Ogasun sailburuaren iritzian, "oso positiboa" da Eusko Jaurlaritzak eta EH Bilduk aurrekontuen inguruan lortutako akordioa, eta "elkarguneak bilatzeko benetako borondatearekin lan egiten denean, lortu egiten da", azpimarratu du.

Ekonomia eta Ogasun sailburuak modu telematikoan egin du agerraldia ostegun honetan, etxean konfinatuta dagoelako, EH Bildurekin Euskadiko 2022ko Aurrekontuen babesa handitzeko lortutako akordioari buruz hitz egiteko.

"Akordio hau ona dela uste dugu, egoera ekonomikoak eta pandemiaren egoerak adostasunak indartzea eskatzen duten une honetan gizarte osoari irudi positiboa emateko", esan du.

Zentzu horretan, aintzat hartu du EH Bilduk elkarguneak bilatzeko eta akordio hori lortzeko egindako ahalegina, "Euskadin gauzak beste era batera egin daitezkeela eta bideragarritasuna eta elkarrizketa baliatzen duen politika posible dela erakusten duelako".

"Politika erabilgarria egiteko ariketa izan da", sailburuaren hitzetan. Akordio horrek "herritarren, gure enpresen eta gazteen ongizatea hobetzen jartzen du fokua; politika ekonomiko publiko adostu baten bidez arazoak konpontzea bilatzen du; azken finean, politika maiuskulaz egitea, zaratarik eta zalapartarik gabe", adierazi du.

EH Bildurekin beste esparru batzuetan akordio politikoak lortzeko aukeraz galdetuta, Azpiazuk esan du "gure konpromisoa aurrekontuen esparruan" dagoela, "baina hemendik aurrera beste akordio batzuk badaude, ongi etorriak izango dira".

Hala ere, sailburuak saihestu egin du akordio horrek beste esparru batzuetan izan ditzakeen inplikazioen inguruan espekulatzea. "Akordio bat hobea da etorkizunean beste esparru batzuetan lankidetzan aritzeko desadostasuna baino; hala ere, gertaerak nola doazen ikusi beharko dugu", gaineratu du.

Azpiazuk azaldu duenez, EH Bildurekin azaroaren 10ean egindako lehen bileraren ondoren, bi negoziazio taldeek diskrezio handiz egin dute lan 20 egunetan.

Ildo horretan, "beren eskakizunak gure aukeretara egokitzen joan dira, konpromiso politiko batzuk baloratu ere egin ditugu, betiere gure eskumenen eta gaitasunen esparruan, eta akordioaren baldintzak egokitu ditugu, azken dokumentua aurkitu arte. Helburua akordio hori zen, eta hala planteatu dugu bi aldeek", azaldu du.

Eusko Jaurlaritzak gehiengo osoa du bere kontuak aurrera ateratzeko, eta kuantitatiboki EH Bilduren babesa ez zen ezinbestekoa, baina, sailburuaren ustez, "oso garrantzitsua da, une honetan Euskadik elkarrizketa, entzute dosi handiak eta euskal gizarteari mesede egingo dioten akordioak behar dituen seinale baita".

Politikan "apaltasunak eta eskuzabaltasunak" duten garrantziaz hitz egin ondoren, Azpiazuk datorren urteko aurrekontuen garrantzi "estrategikoa" nabarmendu du, Euskadin ekonomia suspertzeko, enplegu-aukerak sortzeko eta gizarte-kohesioa bermatzeko.

Akordio politikoak lana eta enplegua, etxebizitza eta I+G+B alorrak jasotzen dituela azpimarratu du, eta neurri ekonomikoak osasunean zentratuta daudela, batez ere Lehen Mailako Arreta indartzeko, larrialdi klimatikoari aurre egiteko eta ongizate energetikoa bermatzeko, babes sozialeko neurriak indartzeko eta gazteen emantzipazio-politikak indartzeko.

Ekonomia-Lankidetza eta Garapenerako Erakundeak Espainia osorako egindako hazkunde aurreikuspenen berrikuspenari buruz ere hitz egin du Azpiazuk, eta lasaitasuna agertu du Euskadin, oro har, eta aurrekontu horietan, bereziki, izan dezakeen eraginari buruz.

Datorren urtean % 3 gehiago biltzea aurreikusi dutela jakinarazi du, aurreikuspen "oso kontserbadorea" eginda, eta BPGaren % 10 inguruko hazkunde nominalari lotuta dagoela.

"Ez da arazorik egongo diru-bilketaren aurreikuspenak betetzeko", esan du Azpiazuk, baina kezkatuta agertu da ekonomiaren hazkundea "moteldu" egin delako; hala ere, horrek ez duela aurrekontuetan eraginik izango iragarri du.

Lehendakariak aurrekontuen akordioaren inguruan ere hitz egin du. Iñigo Urkulluk azpimarratu duenez, akordioak agerian uzten du Jaurlaritza elkarrizketarako prest dagoela, nahiz eta ez duen babes gehigarririk behar 2022ko kontuak aurrera ateratzeko.