Andueza: "Zabalzari biktima izaera aitortu izana albiste ona da. Kasu konkretu hau oso mingarria da"

Eneko Andueza PSE-EE alderdiko idazkari nagusiak ETB1eko Egun on Euskadi saioan azaldu duenez Mikel Zabalzari biktima izaera aitortu izana albiste ona da. "Kasu konkretu hau oso mingarria da", gehitu du. Gai honetan alderdiak aurrerapausoak eman direla azpimarratu du, eta erreparazioaren garrantziaz ere mintzatu da.

Gauzak horrela, eurak beti biktimekin egongo direla nabarmendu du, "berezitasunik egin gabe". "Uste dut justiziak bere lana egin behar duela eta injerentzia politikoak ez du onurarik egiten gai honetan", esan du.

Memoriaren eraikuntzarako oinarri partekatuen aurrean Anduezak dio foco politikoa Legebiltzarrean jartzen bada, askotan gauzak nahasten direla eta gai honetan hori gertatu dela. "Bakoitzak bere bertsio, iragan eta errealitatea izango du, baina biktimak dira erdigunean jarri behar direnak", gaineratu du. Testuinguru horretan gogoratu du zoru etikoa jarrita dagoela eta hori dela minimoa. "Hortik abiatuta egin behar den lana nahiko garbi dago", esan du.

Ukraina ere izan dute hizpide elkarrizketan. Ukrainako eta Errusiako ordezkariek gaur egingo duten bileraren inguruan galdetuta, Anduezak  itxaropena ez dela inoiz galdu behar nabarmendu du: "Espero dugu diplomazioaren bidez, gaurko bileran, gauzak konpontzea". Guzti honen aurrean Europaren papara zein den garbi du PSE-EEren idazkari nagusiak: "Europar Batasunak bere printzipioak tinko mantendu behar ditu eta Ukrainaren alde egon behar dugu".

Europak Ukraniako herritarrei laguntza emateko ateak zabalik izan behar dituela ere gaineratu du: "Ukraniatik ireteten ari den jende guztiari gure babesa eta gure etxeetako ateak zabaldu behar dizkioigu", esan du.

Jaurlaritzak eta Espainiako Gobernuak gutxieneko diru-sarrera Euskadira transferitzeko akordioa itxi ondotik, PSE-EEko idazkari nagusiak esan du luze jo dutela elkarrizketek baina garrantzitsuena azkenean adostasun batera iritsi izana dela. "Borondate politikoa momentu oro egon da, baina ez da nahikoa, juridikoki eta teknikoki ere egin behar da", azaldu du. Ingurumari horretan gogorarazi du eskumenak segurtasun juridiko osoarekin etorri behar direla, nahiz eta askotan horretarako gehiago itxaron behar den.

Hezkuntza Legearen harira Anduezak dio funtsezkoa dela eskola publikoak erdigunean jartzea, betiere "kontzertatuarekiko gerrarik sortu gabe". Guretzako gai hau nuklearra da eta horregatik adierazi ditugu gure desadostasunak eta alegazioak jarri ditugu", gaineratu du.

PPren barne krisiari buruz Anduezak esan du bizi duten une honetan haustekundeak aurreratzea ez litzatekeela oso garbia izango. Nuñez Feijoorengatik baretasuna eta lasaitasuna espero ditu alderdian. "Kezkatzen nauena alderdiak daraman bidea da", nabarmendu da.