Juntsek M12ko atzerriko bozketa errepikatzeko eskatu du, "irregulartasun larriak" atzeman ostean

Juntsek M12ko Kataluniako hauteskundeetako atzerriko bozketa errepikatzeko eskatu du, prozesuaren "osotasuna" arriskuan jarri duten "irregulartasun larriengatik", zehazki, baliogabetzat jotako botoak inpugnatzeko epea amaitu baino lehen suntsitzeagatik.

Carles Puigdemont Kataluniako presidente ohiak zuzentzen duen alderdiak kexa bat jarri du Kataluniako lau probintzietako hauteskunde batzordeetan, M12ko hauteskundeei buruzko atzerriko boto-prozesua errepikatzeko eta bozketa berriro egin arte behin betiko emaitzarik ez emateko eskatuz. 

Juntsen arabera, ustez baliogabeak ziren botoak suntsitzeak "arriskuan jartzen ditu herritarren hauteskunde-eskubideak eta hauteskunde-prozesuaren osotasuna".

Hain zuzen ere, Juntsen hitzetan, Bartzelonan atzerriko botoari dagozkion 1.922 boto-paper gelditu dira zenbatu gabe eta suntsitu egin dira (probintzia horretan kanpotik jasotakoen % 11,05), Gironan, 446 izan dira zenbatu gabe suntsitutako kanpoko botoak (% 22,84), eta Lleidan, 320 (% 18,8). Tarragonan, berriz, ez dute daturik eman.

Girona, Lleida eta Tarragonako Hauteskunde Batzordeek kanpoan bizi direnen botoak zenbatu zituzten atzo, eta emaitzak ez zuen eserlekuen banaketa aldatu.

Martxoaren 12ko hauteskundeetan, PSCren atzetik bigarren gelditu zen Carles Puigdemonten alderdiaren iritziz, botoak zenbatzen ez direnean eta suntsitzen direnean, hauteskundeen emaitzak "nabarmen aldatzen" dira, eta, ondorioz, hautesleek zein hautagaiek "parte-hartze politikorako duten eskubidea urratzen da".

Juntsen arabera, boto horiek hautetsontzietatik kanpo utzi izana eta zenbatu ez izana ez da "boto-emaileen akatsen ondorio", CERAren botoei lotutako akats sistemikoa" baizik, edo, "are okerragoa", hauteskunde-legea ez betetzea.

Juntsen ustez, egoera are gehiago okertzen da kontuan hartuz gero boto horiek inpugnaziotarako legezko epea amaitu aurretik suntsitu direla, horrek ezinezko egiten baitu hauteskunde-prozesuaren bermeei buruzko defentsarako eskubidea baliatzea. Gainera, alderdiaren arabera, "hauteskunde-prozesuaren gardentasuna murrizten da, sistema demokratikoaren gaineko mesfidantza sortu eta sinesgarritasuna murriztearekin batera". 

Halaber, Juntsek ohartarazi du botoak behar baino lehenago suntsitzeak zenbaketa-prozesuan "akatsak edo irregulartasunak ezkutatu" ditzakeela, "nahi gabe zein nahita egindakoak", eta arazo horiek identifikatzea eta zuzentzea zaildu dezakeela.

Era berean, epeak errespetatu gabe botoak suntsitzea erabaki "desproportzionatua eta legearen kontrakoa" izan daiteke, horren esanetan, eta suntsitutako botoak berrikusi ezin izanak "eragotzi" egiten du hauteskunde-auzitegiek erreklamazioak "behar bezala" ebaluatzea eta eskura dagoen ebidentzietan oinarritutako "bidezko erabakiak" hartzea, "prozesuaren legitimitatea kolokan jartzeaz gain".

Ildo horretan, azpimarratu du, Giza Eskubideen Europako Auzitegiak (GEEA) ebatzitakoen arabera, estatuek bermatu behar dutela hauteskunde-prozesuak "gardenak eta bidezkoak" izatea eta herritarren eskubideak errespetatzea; beraz, azpimarratu du botoak "behar baino lehen suntsitzeak" printzipio eta eskubide horiek "urra" ditzakeela. 

Horregatik guztiagatik, "hautesleen eta hautagaitzen eskubideen urraketa hori lehengoratzeko", Bartzelona, Tarragona, Lleida eta Gironan atzerriko botoen prozesua errepikatzeko eta behin betiko emaitzen ebazpena eteteko eskatu du, bozketa berriro egin arte.