Osasun Ituna ixteko “presarik ez izatea” eta “benetako eztabaida egitea” eskatu du EH Bilduk

Datorren ostiralean, ekainak 27, Osasun Mahaiak egingo duen bileran Osasun Ituna ixteko "presarik" ez izateko deia egin du EH Bilduk. Halaber, "benetako eztabaida" egiteko tartea hartzeko beta eskatu du, harreman publiko-pribatuaren gaiak dakarren "korapilo estua" askatzeko eta "Osakidetza indartzeko benetan balio behar diguten politikak ezartzeko".

Bilbon egindako prentsaurrekoan, Eusko Jaurlaritzak planteatutako dokumentuari EH Bilduk egindako zuzenketa aurkeztu du Pello Otxandiano Eusko Legebiltzarreko koalizio abertzalearen bozeramaileak. Esan duenez, aderdiaren helburua "osasun sistema publikoa indartzea” da, “zerbitzua bitarteko publiko eta propioen bidez emateari lehentasuna emanez, eta egiturazko zerbitzu kritikoak eraginkortasunaren, ekitatearen eta kalitatearen printzipioen pean berriz ere jarriz".

Horretarako, EH Bilduk proposatutako zuzenketak bost jarduera-ildo proposatzen ditu:

• "Herri Kontuen Euskal Epaitegiaren laguntzarekin, zerbitzuen prestazioaren inbentarioa egitea sei hilabeteko epean; kontratuak, itunak, hitzarmenak, dirulaguntzak eta beste tresna batzuk kontuan hartuz".
• "Zerbitzuak ekoizteko sektore pribatuarekin egindako kontratuak banaka ebaluatzea". Horretarako, ondoko puntu hauek aztertzea proposatzen dute: kostuak konparatzea, osasun-emaitzetan zein eragin izan duten, ekitateari eta irisgarritasunari nola eragin dioten, arrisku fiskalak eta kontratuko arriskuak ebaluatzea eta Osakidetzarekin pareka daitezkeen lan-baldintzak betetzea, asistentzia-kalitatearen adierazleak eta sektore publikoak nahitaez bete beharreko planak.
• Administrazioak, zerbitzu profesionalek, langileen ordezkariek eta erabiltzaileen ordezkariek osatutako "esparru bat sortzea, zerbitzuak kanpora ateratzeko behar bezala justifikatutako egoera puntualak aztertu eta onartuko dituena, osasun-sistema publikoari mugak jarri gabe".
• "Zerbitzuak integratzeko plan bat egitea; osasun-arlokoak nahiz osagarriak, sektore publikoak zuzenean eman behar dituenak.
• "Ahalmen publikoa, plangintza, antolaketa eta kontratazioa indartzea".

Zuzenketa hori “topagune bat da”, “osasun sistema publikoaren etorkizunarekin konpromiso argia” erakutsi nahi baldin bada.  

Otxandianok azpimarratu duenez, “gai hau ezin da bozketa orokor batekin amaitu”, ezin da "itunaren aldeko edo aurkako jarrera” soila agertu. Bere ustez, ponentziak banaka bozkatu behar dira. Aurreratu duenez, EH Bilduk "erabat tinko" jokatuko du desadostasun nagusiak biltzen dituzten bi gaiei dagokienez (harreman publiko-pribatua eta Zerbitzuen Zorroa), "eztabaida osoaren erdian dauden funtsezko gaiak direlako".

EH Bilduren bozeramaileak kritikatu egin du Eusko Jaurlaritzak "Osasun Ituneko 24 mahaietatik 22tan" akordioa lortu dela esan izana. "Gaur oraindik ez dugu ostiralean bozkatuko diren ponentzien berri", esan du.

Bere ustez, Jaurlaritzak "komunikazio plan bat" izan du. Halaber, salatu du “lan-urte amaieran osasun ituna iragartzea" izan duela helburu, eta iritzi dio “edukiak bigarren mailan” jarri dituela. Bere ustez, ituna "saldu" nahi izan dute, "edukiak behar bezala lantzeko baldintzak eta epeak planteatu gabe". 

Adierazi duenez, "ez da onargarria elkarlanerako foro bat interes alderdikoien mesedetan erabiltzea”, eta azaldu du "parte-hartzaile asko” horrexegatik daudela “haserre".

Ostiralean egingo den bileran akordiorik egongo ote den galdetuta, Otxandianoren hitzetan, EH Bilduk "ez du bertigorik ez itunean egoteko ezta ez egoteko ere”. Nolanahi ere, azpimarratu du ez dagoela “presarik”, eta gehitu du "uztailean denbora nahikoa” dagoela “eztabaida baldintza egokietan egiteko eta jarrerak argitzeko".