Jose Maria Aierdiren iritziz, aurtengo uzta kalitate handikoa izango da, txikiagoa izan arren

Nafarroako mahats-uzta "iazkoa baino txikiagoa, baina oso kalitate onekoa izango da", Jose Maria Aierdi Nafarroako Gobernuko Landa Garapen eta Ingurumen kontseilariaren aburuz. Hala adierazi du, Radio Euskadiko Boulevard saioan egindako elkarrizketan.

Hain zuzen ere, Nafarroako Jatorri Deituraren kalkuluen arabera, 2025eko ekoizpena 40 milioi kilo mahatsekoa izango da, iaz baino % 6 gutxiago. Tenperatura altuen ondorioz, dagoeneko hasi dute mahats-bilketa eta Gabonetarako lehen ardo zuri eta gorriak botilaratzea espero dute upeltegiek.

Aierdik azpimarratu duenez, gidatzen duen Saila eta sektorea elkarlanean aritu dira mahats kopurua murrizteko eta soberakinik ez sortzeko, "uzta berdea" eta horren gisako neurriak hartuta. 

Modu horretara, kalitate handiko ardoak lortuko dituztela uste du, eta dago "kontsumitzaileek ardoaren kalitatea behar bezala" baloratuko dituztela.

Nafarroan ekoitzitakoaren % 60 Estatuan kontsumitzen da, eta gainerakoa esportatu egiten da, batik bat, AEBra. Ildo horretan, Trumpen Gobernuak ezarritako muga-zergek kezka sortzen dute sektorean.

Nekazariek udan izaten duten beste buruhausteetako bat suteak izaten dira. Aurten Nafarroan 600 hektarea inguru erre dira. Estatuko hainbat erkidegotan gertatzen ari denarekin alderatuz gero, egoera askoz hobea ari da izaten Nafarroan. Neurri batean, "prebentzioaren arloan azken urteetan egiten ari den ahaleginak" zerikusia izan du horretan, Landa Garapeneko kontseilariaren arabera.

Aierdik azpimarratu du neurri horiekin "jarraitu" beharra dagoela. Baso-aprobetxamenduaren garrantzia azpimarratu du; "ezin dugu erregairik utzi basoetan", esan du.

Bestetik, baso-antolamendu eta "kudeaketa egokiaz" hitz egin du. "Zer ekoitzi nahi dugun jakin behar dugu, eta horretan aniztasuna garrantzitsua da. Zenbat eta sorta zabalagoa, orduan eta arazo gutxiago", ziurtatu du.

Horrez gainera, Foru Gobernuak hurrengo hilabeteetarako duen erronka bat ere aipatu du; suteetan nekazarien parte-hartzea antolatzeko sistema bat ezartzea. "Euren ibilgailuak eta bizitzak arriskuan jartzen lehenak dira eta beharrezkoa da sistema bat antolatzea".

Beste gai batzuei helduta, Europar Batasunak datozen urteetan nekazaritza arloan izango duen aurrekontuari buruz galdetuta, Aierdi ez dago batere ados aurrekontuarekin. Bere iritzian, urria da eta sektoreko eragileekin batera lan egingo duela adierazi du, Espainiako Gobernuaren aurrean jarrera bateratua azaltzeko.

'Cerdan auzia'ri dagokionez, kontseilariak esan du haren alderdia ziur dagoela Nafarroako Gobernuaren kudeaketa gardena izan dela. "Ustelkeria egon izan balitz, Geroa Bai ez litzateke gobernuan egongo", esan du.