Rodriguez: "Herri hau berriro zutitu behar da bloke neofrankistari ozen esateko ezin izan zutela, ezin dutela eta ezingo dutela"

Iruñeko Anaitasuna pabiloian Sortuk larunbat arratsaldean egin duen ekitaldian, alderdi horretako idazkari nagusi Arkaitz Rodriguezek adierazi du "herri hau" berriro zutitu behar dela bloke neofrankistari ozen esateko "ezin izan zutela, ezin dutela eta ezingo dutela".

"Elkarlan zabalak sustatzeko garaia da, herriari entzuteko unea, gauzak herriarekin egiteko momentua. Garai zailak bizi ditugu, eta are ilunagoak etor daitezke, baina herri honek eta nazio askapenerako mugimenduak badakite zer den hori. Frankismoari, torturari eta gerra zikinari eurre egiteko gai izan ginen, estrategiaz aldatu eta ziklo politiko berri bat irekitzeko, eta gai izango gara herri hau independentziara eta sozialimora eramateko ere", azpimarratu du.

EH Bilduko idazkari nagusi Arnaldo Otegi ere izan da Txiki eta Otaegiren hilketen 50. urtemugaren kariaz, "Askatzera lotuak" lelopean, Nafarroako hiriburuan egin duten ekitaldian.

Rodriguezek haiek omenduz hasi du berbaldia, ozen esanez Txikik eta Otaegik zuten amets eta askatasun grinak gurean dirauela. "Hemen jarraituko dugu libre eta berdinen euskal errepublika eraiki arte, haiek bezalaxe gu ere askatasun haizea garelako", esan du.

"Ezker independentismoa kaltetu nahian" dabiltzanei bidali die bigarren mezua. "Hemen batzuek Txiki eta Otaegiren memoria kriminalizatzen jarraitzen dute, baina demokraziaren eta askatasunaren aldeko borrokalariak izan ziren, eredu politiko dira, eta horrela izan beharko lukete beren burua demokratatzat duten guztientzat ere", adierazi du.

Hirugarrenik, argi utzi du "independentziak eta sozialismoak inoizko gaurkotasun handiena" dutela. "Ez gara ez frantsesak, ez espainolak, euskaldunak baizik, eta gure buruaren jabe izateko eskubide osoa dugu", aldarrikatu du.

Antifaxistak direla esanez sartu da hitzaldiaren laugarren blokean. "Euskal herritarra da Euskal Herrian bizi eta lan egiten duen pertsona oro, denok gara beharrezko berdinen arteko euskal errepublika sortzeko bidean, jaioterria edo azalaren kolorea bat zein beste izan. Garrantzitsuena da herri aberatsago eta hobeago bat eraikitzeko borondatea", zehaztu du.

Bukatzeko, duela 50 urteko erronka bera mahai gainean jarrita esan duenez, Espainiako Gobernuak aukera paregabea du "espainiar arazoari" irtenbide bat emateko. "Bai, espainiar arazoa esaten dut Espainia delako herrialde plural bat dela onartzeko gai ez dena, herriei beren etorkizuna erabakitzeko eskubidea bermatu behar diena", azaldu du.

"Urrats berri bat egitea da orain dugun erronka handiena, munduaren luze-zabalean gertatzen ari den bezalaxe, gerta litekeelako bloke erreakzionario autoritarioa Espainiako Gobernura iristea, eta ondorioz agenda neofaxista bat ezartzea. Aukera eta erronka horri erantzuteko, eta mehatxuari aurre egiteko, inoiz baino gehiago indarrak batu behar ditugu, inoiz baino gehiago herri bat garatu behar dugu, errespetu eta askatasun eske", erantsi du.