Borja Semper, politikara itzuli berri: "Ez dut zirku eta irain kontuetan parte hartuko"

Borja Semper PPko Kultura eta Kirol arloko idazkariorde eta bozeramaileak astearte honetan adierazi du ez duela parte hartuko gaur egungo bizitza politikoan nagusitzen diren “zirku eta irainetan”. Adierazi duenez, itzuli da “muturrekoek gizartea zatitzeko ezartzen dituzten joko arauen aurka altxatzeko”.

Adierazpen horiek Nueva Economia forumean egin ditu. Politikaren lehen lerrora itzuli eta berehala parte hartu du horretan; izan ere, hamar hilabetez politikatik kanpo egon da, pankreako minbiziagatik.

“Politikari orekatuaren figura”

Semperren ustez, beharrezkoa da “lasaitasuna eta zentzua ekartzea Espainiako politikara”, politikaren prestigioa eta duintasuna berreskuratzea, eta “politikari orekatuaren figura” defendatzea, “lasaitasuna eta zentzua” eskain baitezake.

Alberto Nunez Feijoo PPren buruak aurkeztu du Semperren hitzaldia, eta politikari irundarrak adierazi du PP ez dagoela “degradazio eta gainbehera dinamikatik kanpo”, eta aitortu du “baduela bere erantzukizun zatia”; hala ere, adierazi du ezin zaiola "gobernatzen duenari eta gobernatzen ez duenari erantzukizun maila bera eskatu”.

Horrela, hilabete hauetan politika kanpotik behatzen aritu dela azaldu du, eta esan du konturatu dela gaur egun “normaltzat" jotzen direla "beste garai batean ohiz kanpokoak izango liratekeen eta eskandalua eragingo luketen gauzak”. Adibide gisa jarri du epaileek, Gobernua ikertzen dutenek, jasaten duten “eraso sistematikoa” eta boterea “kontrolatzen duten komunikabideen kontrako jarrera”.

Politikari gipuzkoarrak 2025eko uztailaren 14an minbizia zuela jakinarazi zuen, eta astelehen honetan berriz sartu da alderdiaren zuzendaritza batzordean. Hurrengo batzordean bozeramaile gisa arituko da berriro.