Eroskik supermerkatua ireki du Leioan, campus batean lehen aldiz

EHUko Leioako campusean Aliprox supermerkatu bat ireki du Eroskik, asteazken honetan. Estatu osoan campus batean irekitzen duten lehen supermerkatua da.

Eroskiren (frankiziatzailea) eta Ikasi eta Erosiren (sozietate frankiziatua) apustu berritzaile bat da, eta unibertsitate-komunitate osoari campusean eskainitako zerbitzuak hobetzeko asmoa du.

Aliprox supermerkatu frankiziatua 08:00etatik 20:00era irekiko dute, liburutegi nagusiaren eraikinean kokatuta dago eta hiru lanpostu zuzen sortu ditu.

Lokala egokitzeko eta zerbitzua kudeatzeko kontratua iragan urrian esleitu zuen EHUk, lehiaketa publiko bidez eta 12 urterako.