EBk gaur erabakiko du opor fiskalengatik isuna jarri ala ez

Europar Batasuneko (EB) Justizia Auzitegiak gaur erabakiko du 90eko hamarkadan euskal enpresei emandako 'opor fiskalak', legez kanpoko jo zirenak, beranduegi itzultzeagatik isuna jarri ala ez.

Europako Batzordeak 64.543.000 euroko isuna eskatu zuen, 25.817,4 euro laguntzak legez kanpokoak zirela ebatzi eta dirua itzultzea ebatzi zenetik pasatu ziren egun bakoitzeko.

Auzitegiko abokatuetako bat isuna jartzearen alde agertu zen, baina Europako Batzordeak eskatutakoa baino isun txikiagoa, 50 milioi eurokoa hain zuzen ere.

Abokatu orokorraren proposamenak izaera loteslerik ez badu ere, EBko Auzitegiak iritzi horri jarraitzen dio ia kasu guztietan.

Gainera, Justizia Auzitegiaren ebazpena irmoa izango da eta ez da helegitea jartzeko aukerarik izango.

'Opor fiskalak'

'Opor fiskalek' elkarteen gaineko zerga ez ordaintzeko baimena ematen zieten hamar urterako 1993 eta 1994 artean EAEn sortzen ziren enpresei.

Neurri hori 1996ean osatu zuten zerga kredituaren bitartez. Horri esker, euskal enpresek elkarteen gaineko zergaren bitartez inbertsioen % 45 berreskura zezaketen, inbertsioa 15.025.303 eurotik gorakoa bazen.

1993 eta 2000 artean, EAEn aipatu laguntza indarrean zegoenean, 300 enpresa inguruk aprobetxatu zuten.

Nork ordainduko du isuna?

Aldundiak ez dira ados jartzen isuna jasoz gero nork ordaindu beharko lukeen erabakitzerako garaian. Bizkaiak lurralde bakoitzak itzuli beharreko diruaren arabera ordaintzea proposatu zuen. Araba, berriz, horren kontra agertu da, kalte gehien berari egiten diolako.

Hala ere, Gipuzkoak ere ez du irtenbide hori begi onez jo, eta "ardura politikoak" eskatzen ditu, 'opor fiskalak' indarrean jarri zirenean EAJk agintzen zuelako Araban.

EBko abokatu orokorraren arabera, 322,3 milioi euro ziren itzuli beharrekoak: Arabak 212,4 (% 65,89), Bizkaiak 68,7 (% 21,31), eta Gipuzkoak 41,2 (% 12,8).