53 zergadunek 292 milioi zor dizkiote Gipuzkoako Ogasunari, gehienak enpresak

Gipuzkoako Ogasunak astearte honetan argitaratu du altxor publikoarekin zor handiak dituzten zergadunen bosgarren zerrenda, eta guztira 292,4 milioi euroko zorra duten 53 pertsona biltzen ditu. Zehazki, 2019ko abenduaren 31n Ogasunarekin milioi bat eurotik gorako zorra zuten pertsona fisiko edo juridikoak identifikatzen ditu zerrendak.

Aurreko zerrendari dagokionez (iazko ekainean argitaratu zen), 87,8 milioi euroko zorra duten sei zergadun berri sartu dira, eta 33,3 milioi zor zituzten 19k atera dira, Gipuzkoako Foru Aldundiak ohar batean azaldu duenez.

Gipuzkoako Foru Aldundiaren egoitza elektronikoan kontsulta daiteke zerrenda. Izenen argitalpena foru erakundearen "zerga-ihesari aurre egiteko estrategiaren" barruan kokatzen da, eta "zerga-jokabide gaitzesgarrien publizitatearen bidez iruzurraren deslegitimazio sozialari laguntzea" du helburu.

Foru Ogasunak, zordun handien zerrenda argitaratuz, "zerga-betebeharrak borondatez betetzeari buruzko pedagogia egitea" bilatzen du, eta, horrela, "gizartearen gaitzespena lortu eta iruzurrarekin bat datozen jarrerak eta portaerak deslegitimatzea".

Ogasunarekiko zorrak, 2019ko abenduaren 31n, milioi bat eurotik gorakoak zituzten zergadunen identifikazioak jasotzen ditu zerrendak, borondatezko ordainketa-aldiko zorrak eta geroratutako, zatikatutako edo etendako zenbatekoak kontuan hartu gabe.

Zordunen artean Lagilur SL (80.225.787 euro), LH Commodities & Investments SL (22.930.693 euro), Fagor Electrodomésticos S. Coop. (8.118.093 euro), Tecfrindus SA (6.226.905 euro), El Rincon del Ebanista (6.110.155 euro), Papelera del Araxes (5.929.012 euro), Ramón Vizcaíno Refrigeración SA (5.373.923 euro), Construcciones y Contratas Gedi (5.250.688 euro), edo Industrias Lagun Artea (4.063.55 euro) daude. Era berean, Gipuzkoako bi zergadunek 31.585.802 eta 31.470.396 euro zor dituzte, hurrenez hurren.

Araudiaren arabera, datorren urtean berrituko dute zerrenda, 2020ko abenduaren 31ko datarekin. Zerrenda argitaratzeak ez du eraginik izango zordunak erreferentzia-data horren ondoren egindako jarduketetan.

Zerrendan sartzeko proposamena zergadunari jakinarazi ohi zaio, eta hark 10 egun ditu alegazioak aurkezteko. Epe hori igarota, argitaratzeko erabakia hartzen da.

Bitarteko elektronikoen bidez egiten da, eta argitaratze-datatik hiru hilabete igaro ondoren ez da eskuragarria. Era berean, beharrezko neurriak hartzen dira Interneteko bilatzaileek informazio hori eskura ez dezaten.