Bilbok merkataritzari zuzendutako bonu kanpaina berria abiatu du

Bilboko Udalak merkataritza-bonuen kanpaina berri bat jarri du abian pandemiak eragindako krisiari aurre egiteko. Kanpaina milioi bat euroko laguntza du 64.115 bonu zirkulazioan jartzeko. Aurtengo edizioan, honako motako establezimenduek ere parte hartu ahalko dute ekimenean: irudi pertsonaleko zerbitzuak, argazkigintza, garbitegia eta gimnasioak.

Kanpaina gaur (apirilak 13) hasi da, interesa duten establezimenduak atxikitzeko epea irekiz. Bonuak maiatzaren 5etik erosi eta erabili ahalko dira.

Kanpaina Bilbao Aurrera 2021 Planaren (iaz bultzatutako lehen planaren jarraipena) barruan kokatzen da. Plan hori udalean ordezkatuta dauden talde politikoek covid-19aren ondorioei aurre egiteko adostutako neurrien multzoa da.

Arduradunen arabera, helburua da kontsumo zuzena bultzatzea hirian, pandemiak gehien kaltetutako sektoreei laguntzeko, barrutien araberako banaketa espezifikoarekin, "auzo guztietan eta hurbileko saltokietan eragina bermatzeko".

Aurreko ekitaldiko Bilboko bonuek "arrakasta" izan ondoren, Udalak merkataritzara zuzendutako kanpaina aktibatu du orain, gainerako sektoreetatik (kultura, ostalaritza eta turismoa) bereizita, eta "berrikuntza handiekin".

Establezimenduak atxikitzeko epea gaur hasi da www.bonobilbao.eus web plataforman, eta irudi pertsonal (ile-apaindegia, estetika edo masajeak), argazkigintza, garbitegi eta gimnasio zerbitzuak ere bilduko ditu.

Aurrekontu handiagoa eta bonu gehiago egongo dira. Partida milioi bat eurokoa izango da eta 4,4 milioi euro baino gehiagoko negozio bolumena sortuko duela aurreikusi dute. Guztira, 64.115 bonu emango dituzte (48.727 izan ziren aurreko kanpainan).

Bonuek 30 euroko balioa izango dute, erdia Udalak ordainduko du, eta www.bonobilbao.eus plataforman eta sarrerak saltzen dituzten Kutxabankeko kutxazainetan erosi ahalko dira. Hala ere, berrikuntza gisa eta leize digitala gainditzeko asmoz, 65 urtetik gorako pertsonek ere erosi ahalko dituzte atxikitako establezimenduetan, agortu arte.

Bonuak maiatzaren 5etik ekainaren 30era, edo agortu arte, erosi eta erabili ahalko dira. Udalak azaldu duenez, "kanpainaren epea laburragoa da udaberriko denboraldian zentralizatzeko".

Oraingo honetan, bost bonu erosi ahalko dira NAN bakoitzeko, eta erosketa-txartel bakoitzeko lau erabili ahalko dira. Bilboko bonuak, gainera, bateragarriak eta metagarriak dira beste administrazioek abian jarritakoekin. Establezimendu bakoitzeko 150 bonu izango dira gehienez.

Saltokiak atxikitzea

Saltokiak www.bonobilbao.eus plataformaren bidez atxiki daitezke. Udalaren edo erakundeen arteko 2020. urteko kanpainan parte hartu zutenentzat ez da beharrezkoa izango beste alta oso bat egitea; mezu elektroniko bat jasoko dute esteka batekin, Bilboko bonuen baldintza berriak onartzeko eta datuak eguneratzeko.

Bilbon hainbat establezimendu dituzten IFK bakarreko negozioak establezimendu guztietan atxiki ahalko dira, banaka.