Bizkaiko hegoaldeko trenbide-saihesbidearen obrak urtea amaitu baino lehen hasiko dira

Bizkaiko hegoaldeko trenbide-saihesbidearen obrak aurten amaitu baino lehen hasiko dira, Ortuellako udalerritik igarotzen den zatia, hain zuzen ere. Hala iragarri du Eusko Jaurlaritzako Mugikortasun Iraunkorreko sailburu Susana Garcia Chuecak, Gasteizko Legebiltzarreko kontrol-saioan egindako galdera bati erantzunez.

Sailburuak gogorarazi du lan "konplexua" dela eta salgaien trenak Ezkerraldetik ateratzea duela helburu.

Ekimena Euskal Trenbide Sarearen bidez gauzatuko da, Espainiako Gobernuak hala eskatuta, eta bere baitan hartzen ditu bai lehen fasearen proiektua, bai Serantesko tunelaren eta Olabeagaren artean dauden zazpi tarteetako obren garapena, baita Arrigorriagaraino iritsiko den bigarren fasea ere.

Sailburuak azaldu duenez, horrek esan nahi du merkantzia-trenek ez dutela Santurtzi, Portugalete, Sestao eta Barakaldoko "bihotza" zeharkatu beharko. Bertatik, "aldiriko trenek bakarrik zirkulatuko dute, iberiar zabalera baitute trenbide horiek". 

"Horrek jauzi kualitatiboa ekarriko du udalerri horien bizi-kalitatean, segurtasun handiagoa izango baitute, eta, aldi berean, azpiegitura berriak lehiakortasun ekonomikoaren plusa emango digu portua abiadura handiko sarearekin lotzeagatik", gaineratu du.

Bilboko porturako sarbide berria

Hegoaldeko trenbide-saihesbidearen lehen faseak Seranteseko tunela lotuko du Bilboko Olabeaga auzoan dagoen trenbide-sarearekin. Horri esker, Bilboko porturako sarbide berri bat egongo da trafiko mistorako, merkantziak Ezkerraldeko hiriguneetatik igaro ez daitezen.

Lehen esku-hartze hori, lehen faseko luzeena (3,2 kilometro), 100,6 milioi eurokoa da.

Obren lehen zatia Ortuellako udal-mugetara mugatzen da, joan den udaberrian esleitu zen eta 38 hilabeteko epea du lanak egiteko. Lanak urtea amaitu baino lehen hasiko dira.

Ortuellako zatia 385 metroko tunel faltsu batekin hasiko da, dagoeneko eraikita dagoen Seranteseko tunelaren jarraipena emanez. Puntu horretatik aurrera, 736 metroko zabalera mistoko trenbide bikoitzeko tunel bat egingo dute, eta haitzulo batera igaroko da. Haitzulo horretan, bide bikoitza bide bakarreko bi adarretan banatuko da.

Lizitazio honen xede den proiektuak, hortik aurrera, bide bakarreko tunel bat egitea aurreikusten du; tunel horrek 1.440 metroko luzera izango du, eta saihesbidearen prestazio handiko enborrarekin lotzeko haitzuloan amaituko da.

Obraren lehen zatiko azken segmentu horrek 620 metroko luzera du, eta meategiko tunelean garatzen da oso-osorik.

Euskal Trenbide Sareak dagoeneko esleitu du obraren lehen zatiko obren zuzendaritzan laguntzeko zerbitzua. 2,6 milioi euroko aurrekontua du.

485 milioiko kostua lehen fasean

Azpiegitura horren proiektuak eta eraikuntza Espainiako Gobernuak eta Eusko Jaurlaritzak eta Adifek 2017an sinatutako lankidetza-hitzarmenean daude jasota.

Bi fasetan banatzen da obra: batetik, Eusko Jaurlaritzari eskatzen zaio lehen faseko eraikuntza-proiektuak idazteko eta plataformako obrak egiteko, eta, bestetik, Eusko Jaurlaritzari agintzen zaio bigarrenaren informazio-azterlana idazteko.

Akordio berean jasotzen denez, lanen kostua, 484,7 milioikoa, lehenengo fasean bakarrik, Eusko Jaurlaritzak aurreratuko du, eta Kupoa murriztuz konpentsatuko da.

Konexio berriak zuzenean lotuko du Bilboko portua Europarekin, Atlantikoko korridorea osatzen duen Europa Barneko Sarearen bidez, zabalera estandarreko (nazioarteko) konexio bat sortuko baitu, Frantziarekiko mugan "ontzi-aldaketa" saihestuko duena.