Fiskaltzak CAFen aurkako ikerketa abiatu du, Jerusalemgo tranbiaren eraikuntzan duen inplikazioagatik

Espainiako Fiskaltza CAFen aurkako salaketa bat ikertzen ari da Jerusalemgo tranbiaren eraiki eta mantentzeko lanean duen inplikazioagatik. Azpiegiturak Jerusalem ekialdean okupatutako lurraldeak eta Jerusalem mendebaldea lotzen ditu. 

Fiskaltza Nagusiaren iturriek zabaldutako informazioaren arabera, pasa den otsailaren 18an gizarte zibileko sei erakundek salaketa jarri zuten Espainiako Fiskaltzan, CAFeko administrazio kontseiluaren eta sei filialen zuzendarien aurka. Salatzaileen artean daude, besteak beste, NOVACT eta Comunitat Palestina de Catalunya elkarteak. 

Salaketa aztertu ondotik, Gazan gertatutako nazioarteko zuzenbidearen urraketak ikertzeko Auzitegi Nazionalean irekitako eginbideetan gehitzea erabaki zuen Ministerio Publikoak. 

Salaketa-jartzaileen arabera, Jerusalemgo tranbiak nazioarteko zuzenbide humanitarioa urratzen du. Ildo horretan, CAFeko administrazio kontseiluari eta sei filialen zuzendariei gizakien aurkako gerra krimena leporatzen diete.  

Salaketan hiru delitu aipatzen dituzte: herritarrak lurralde okupatuetara lekualdaraztea, arraza segregazioa sustatzea eta 1949ko Genevako Laugarren Konbentzioa urratzea.  

Aipaturiko tranbiak Jerusalem ekialdean okupatutako lurraldeak eta Jerusalem mendebaldea lotzen ditu, eta elkarteek salatu dutenez, toki horien arteko integrazioa indartzen eta Palestinako auzoen arteko zatiketa areagotzen laguntzen du CAFek. 

Espainiak kasua ikertzeko jurisdikzioa du, salatzaileen arabera. Azaldu dutenez, gertaerak Espainiatik kanpo gertatu arren, CAFen egoitza nagusia eta bere erabaki korporatiboak eta gobernu organoak Espainian daude. 

CAF taldeak eta Saphir eraikuntza enpresak osatutako partzuergoa 2019an aukeratu zuten Jerusalemgo tren arinaren proiektua egiteko. CAF tranbia eraiki eta mantentzeaz arduratzen da, Saphir Israelgo eraikuntza enpresarekin batera. Halaber, tranbiarako bagoiak ez ezik, seinaleztapen, energia eta komunikazio sistemak hornitzeko lanak egingo ditu.

Jaurlaritzaren eta Aldundiaren erantzuna

Eusko Jaurlaritzaren bozeramaile Maria Ubarretxenak adierazi du “gertu-gertutik jarraituko” dutela CAFen aurkako salaketak zein ibilbide egiten duen, Jerusalemgo tranbia eraikitzeko proiektuan izan duen parte-hartzea dela eta. Eusko Jaurlaritzako Gobernu Batzordearen osteko prentsaurrekoan, Ubarretxenak adierazi du prozesua “erabat errespetatzen” duela.

Bestalde, Gipuzkoako ahaldun nagusi Eider Mendozak adierazi du “Gazan gertatzen denaren erantzukizuna Netanyahurena" dela, eta, horregatik, “kanpoan dauden etsaiak etxean ez bilatzeko” eskatu du.

“Gazan gertatzen ari denaren erantzukizuna (Benjamin) Netanyahurena da, ez beste inorena. Palestinako egoera ez da erakunde publikoen, enpresen ezta unibertsitateen erantzukizuna”, azpimarratu du diputatu nagusiak.

Jerusalemgo tranbiaren proiektua bertan behera uzteko eskatu dio LABek CAFi

LAB sindikatuak CAF enpresari eskatu dio Jerusalemgo tren arinaren proiektua bertan behera uztea, proiektuak nazioarteko zuzenbidea urratzen duelakoan. 

Ohar bidez azaldu duenez, LAB hasiera-hasieratik agertu da CAFek proiektua egitearen aurka, eta bere posizioa behin eta berriz adierazi izan du.

Ildo horretan, CAFen zuzendaritzari proiektutik erretiratzeko eskatu dio, "azpiegitura hori Palestinako lurretan legez kanpo eraikita dauden Israelgo kokaguneak lotzeko" erabiliko delako. "NBEk berak Jerusalem ekialdeko lurren okupazioa legez kanpokotzat hartzen duen neurrian, proiektua bera legez kontrakoa da, nazioarteko zuzenbideari dagokionez", gaineratu du.