Emakume irandar batzuek euren burua belo gabe erakutsi dute Facebooken

Webguneak 30.000 “atsegin dut” baino gehiago jaso ditu lau egunetan, eta zeresan ugari eragin du sare sozialean.

Web horrek "Irango emakumeen askatasun kautelazkoa" du izena, farsi edo persieraz, "Utzi haizeari zure ile-adatsa astintzen" du azpititulua, eta, orrialde nagusian zehazten duenez, ez du inolako alderdi politikorekin loturarik.

"Orrialde honek Irango emakumeen kezkak jasotzen ditu", irakur daiteke web anonimo horren aurkezpenean, eta baita honakoa ere: "Irango neska eta emakume guztiak euren jaioterrian preso daude euren janzkera aukeratzerakoan aske izatea eragozten dieten gizarte mugak eta arauak daudelako".

"Muga horiek guztiak izan arren, horiek hertsatzen dituzten mugetatik ateratzeko aske izaten dira batzuetan. Web honek une horiek jasoko ditu, emakumeek euren janzkera aukeratzeko eskubidea lortu arte", azaldu dute bertan, eta argazkia bidali nahi duten emakume guztiak hori egitera bultzatu ditu, baina zuhurtzia ere eskatu die, argazkiak publikoki zabalduko baitira.

Bertan aireratu dituzten argazkietan ageri diren protagonistetako batzuk betaurreko ilunak jantzita edo inork ez ezagutzeko moduan jarrita ageri dira, baina bada aurpegia erakutsi eta toki publikoetan beloa kendu duenik ere askatasun une hori argazki batean jaso eta mundu osora zabaltzeko.

Orrialdea Masih Alinejad kazetari eta idazle irandarrak zabaldu zuen. Londresen erbesteratuta dago, eta oso kritiko agertu da beti Irango Erregimenarekin.

Orain arteko kritika gehienak positiboak izan dira, eta emakume askok haizea ile-adatsa laztantzen sentitzeko gogoa dutela esan dute.

Adineko emakume batek pozik ikusi ditu ilea solte duten emakume horien argazkiak, eta "askatasun garai baten abiapuntua” izatea espero duela gaineratu du.

"Gizonezkoek ere jasatea espero dut", esan du mutil batek, eta emakume batek berehala galdetu dio ea gizonezko irandarrek emakume baten ilea ikustea jasateko kemenik ez duten, eta "ona da apurka-apurka ohitzen joatea", gaineratu du.

Urtero-urtero, udaberri hasieran, emakume askok, gazteenek bereziki, nasaiago interpretatzen dute legeak ezartzen dien kode estetikoa, eta laburtu egiten dute gorputz osoa estaltzen dien "estalki" luzea, eta besoak estaltzen dizkiena, edo oihal arinagoak eta gardenagoak janzten dituzte, eta horrek sutan jartzen ditu erlijioaren defendatzaile sutsuenak.

Facebookeko orrialde horrek kritikak jaso ditu berehala sektore kontserbadoreenetatik.