Nijarko kabalgatako Baltasar Erregea hil da, jarlekua lurrera erorita

Nijarko kabalgatan Baltasar Erregearena egin zuen 20 urteko gaztea hil da Torrecardenaseko Ospitalean gaur, asteartea, larri zauritu eta gero, zihoan karroza iraulita. Karrozak kable batekin topo egin zuen eta, ondorioz, jarlekua lurrera jausi zen.

Gaur goizean goiz Zainketa Intentsiboko Unitatean ospitaleratu dute, egoera kritikoan baina, halere, hil egin da. Udalak ikerketa bat abiarazi du gertatutakoaren nondik norakoak argitzeko.

Babes Zibilak atzoko 20:20ean eman zien gertatutakoaren berri Larrialdi Zerbitzuei. Istripuaren ostean, zerbitzu medikuak jakinaren gainean jarri zituzten eta gaztea ZIUan ospitaleratu zuten arta zezaten.

Era berean, kabalgata bertan behera utzi zuten, ezbeharra gertatu eta berehala, Vistabellako gunean, 19:30ean kabalgatak hasi besterik egin ez zuenean, Antonio Jesus Rodriguez Nijarko alkateak Europa Press albiste agentziari zehaztu dionaren arabera.

“Oraindik ez dago argi zein moduko kablea zen, argindarra edo telefono seinalea zeramana”, esan du alkateak. Gainera, azaldu du ikerketa abiarazi dutela gertatutakoa argitzeko eta, besteak bestea, kablea behar zuen altueran jarrita ote zegoen jakiteko.