Eibarko ospitale berriak Debabarrenako 75.000 lagun artatuko ditu

Eibarko ospitalea inauguratu dute gaur goizean, Debabarrenako 75.000 biztanleak artatzeko asmoz. Alabaina, datorren urriaren 29a arte ez da funtzionamenduan izango, eta ospitaleratze zerbitzua bi fasetan jarriko dute abian.

Guztira 72 ohe izango ditu eta ondoko zerbitzuak eskainiko dituzte: Lehen Mailako Arreta, Osasun Mentala eta Erradio-diagnostikoa. Halaber, Kanpo kontsultako zerbitzuak ere izango dira, zortzi espezialitaterenak, baita errehabilitazioko zerbitzua eta ospitaleratzeko hiru unitate ere.

Iñigo Urkullu lehendakaria eta Jon Darpon Osasun sailburua izan dira inaugurazioan. "erbitzu publiko unibertsala eta kalitatezkoa eskaintzeko bidean, Eusko Jaurlaritzak eta Osakidetzak urratsa eman dute ospitale hau martxan jarrita", azpimarratu du lehendakariak.

Nolanahi ere, Mendarako ospitaleak "erreferente" izaten jarraituko duela erantsi du.

Eibarko ospitaleak eraikitzeko 27 milioi euro erabili dituzte, eta beste lau milioi ekipamendua erosteko. Urteko aurrekontua 7,3 milioi eurokoa izango da. 200 bat profesional arituko dira lanean. Gipuzkoan bost erietxe publiko daude jada.

21.000 metro koadroko azalera dauka eta bost solairu ditu, horietako bi lur azpian. Errehabilitazio, erradio-diagnostikorako eta osasun publikoko gelak lurpeko solairuetan daude, baita kafetegia, ekitaldietarako aretoa eta bulegoak ere.

Harrera eta informazio gunea, Lehen Mailako Arretarako Unitatea -7 mediku kontsulta, 7 erizaintza gela eta pediatria mediku eta erizain gela bana-, osasun mentalerako zentroa eta Arreta Iraunkorrerako Gunea beheko solairuan izango dira.

Ospitaleratzerako unitateak, berriz, lehenengo eta bigarren solairuan izango dira. Bigarren fasean, 20-24 ohe egongo dira erabilgarri, eta gainerakoak hirugarren fasean jarriko dituzte.

Gainera, bigarren solairuan errehabilitaziorako gelak eta kanpoko 14 kontsulta egongo dira.