Euskotrenek LABIri erantzun dio gaitasunaren ia % 100ean ematen ari dela zerbitzua

Jende pilaketak galarazteko LABIk garraio publikoa indartzeko egin duen eskaeraren aurrean, azpiegituren kudeatzaileek erantzun egin dute.

Hala, Euskotren sozietate publikoak adierazi du bere gaitasunaren ia %100 eskaintzen ari dela lanegunetako eguneko zerbitzuetan, hala trenetan nola Bilbo eta Gasteizko tranbietan. Une honetan, gaueko tren zerbitzua bakarrik dago mugatuta, azken irteerak 00:00etan egiten baitira beranduenera jota.

Euskotrenek jakinarazi duenez, garraio publikoaren sektorearen gainerakoan gertatzen den moduan, Euskotrenek bidaiarien beherakada nabarmena izan du pandemian, goizeko edo arratsaldeko ordu tarte jendetsuenetan bidaiari gehiago izaten diren arren.

Pandemia hasi zenetik, Euskotrenek etengabe monitorizatu du egoera bere garraiobideetan, beharrezkoak diren neurri zuzentzaileak hartu ahal izateko, eta Larrialdiei Aurregiteko Bideak (LABI) igandean emandako argibideei jarraituz, ordu jendetsuenetako zerbitzua indartzeko bideragarritasun teknikoa aztertzen ari da.

Sozietate publikoak azaldu duenez, maiztasuna gehitzea eta ohiko ordutegiak aldatzea planteatzeko kontuan izan behar dira trenek eta tranbiek dituzten muga espezifikoak, hala nola azpiegituraren beraren gaitasuna, trafikoa arautzeko seinaleen sistema, segurtasun neurriak eta tren edo tranbia unitateen kopuru mugatua.

Garraio publikoko enpresek  LABIk egindako gomendioei era koordinatuan erantzuteko asmoz, neurriak Euskadiko Garraio Agintaritzaren (EGA) Garraioa Koordinatzeko Mahaiaren bileran landuko dira. Bilera hori ostegunean egingo da, azaroaren 5ean.

Lurraldebusek % 80ra murriztu du edukiera

Lurraldebusek, Gipuzkoako Aldundiaren herri arteko garraio publikoak, zerbitzuaren eta maiztasunen % 100a eskaintzen duela hitzeman du, eta % 80ra murriztua duela ibilgailuen edukiera "jende pilaketak galarazteko".

Horixe azpimarratu du gaur Rafaela Romero Gipuzkoako Mugikortasun diputatuak, eta gogorarazi % 80ra murriztuta dagoela ibilgailuen edukiera ekainetik, deseskalatzetik hain zuzen ere.

Era berean, Romerok adierazi du konfinamenduaren ostean hasi zirela "oraingo aholkuak ezartzen", eta ospitaletara joateko zerbitzuak indartu zituela, eta gauekoa, kendu.

Gainera, Lurraldebusek kontrol zentro bat omen du ibilgailuen edukiera unean unean zein den jakiteko, eta horren aurrean neurriak hartzeko jende pilaketarik egon ez dadin.

Egungo eskaria, 2019koaren aldean, batez beste % 75ekoa dela aipatu du.

Metro Bilbaorentzat ez da bideragarria

Eneko Arruebarrena Metro Bilbaoko zuzendari gerenteak baieztatu du "teknikoki bideraezina" dela zerbitzua indartzea, LABI Euskadiko Babes Zibileko Planaren aholku-batzordeak eskatutakoari erantzunez. "Trenen maiztasuna seinaleztapen sistemak mugatzen du batik bat, eta horrek segurtasuna bermatzen du gidatzeko orduan", azaldu du.

Langileen uniforme berria aurkezteko egindako agerraldian, eta garraio publikoaren maiztasuna areagotzeari buruz galdetuta, Metro Bilbaoko arduradunak esan du asteburuan % 35ekoa izan dela bidaiari kopurua, baina astea hasi eta batera % 62ra igo dela. Halere, azpimarratu du % 100eko zerbitzua ematen ari direla.

Arruabarrenaren esanetan, "teknikoki bideraezina" da zerbitzua indartzea. Esan bezala, trenen maiztasuna mugatua da, eta gehienez, ordu gorietan bi minutu eta erditik behin jarri ditzakete trenak.

Nolanahi dela, argi utzi du Bizkaiko hiriburuko metroak pandemiaren aurkako segurtasun neurri guztiak betetzen dituela: maskararen derrigorrezko erabilera, gel hidroalkoholikoa geltoki guztietan eta "garbiketa sakonak".

Era berean, nabarmendu du metroko joan-etorriak "laburrak" direla. "Gainera, normalean bidaiariak isilik doaz, eta lau minututik behin airearen % 100 berritzen dugu", bukatu du.