Emakundek adineko emakumeen aurkako indarkeria ikusarazteko kanpaina abiarazi du

Emakundek eta Eusko Jaurlaritzako Berdintasun, Justizia eta Gizarte politiketako Sailak kanpaina bat bultzatu dute adineko emakumeek urte askotan bizi izan duten genero indarkeria ikusarazteko.

Izaskun Landaida Emakundeko zuzendariak eta Zuriñe Elordi erakundeko idazkari nagusiak, azaroaren 25ean, Emakumeen aurkako indarkeria ezabatzeko Nazioarteko Egunaren harira diseinatutako kanpaina aurkeztu dute gaur goizean.

"Kanpainak 55 eta 79 urte bitarteko zazpi emakumeren testigantzak jasotzen ditu. Zazpi horietatik bik, indarkeria psikologikoaz gain, indarkeria fisikoa ere jasan dute", azaldu dute prentsaurrekoan.

Emakunderen arabera, ez da ohiko kanpaina bat; izan ere, "emakumeak eurak dira kanpainaren protagonistak eta mezuaren aukeraketaren protagonistak; izan ere, mezu horren helburua haien ikusezintasuna eta gizarteari egindako dei bat da, emakumeek bizi izan dituzten egoerei adi egoteko".

"Euren testigantza ematea ez da batere erraza izan emakume horientzat, baina guztiek beste emakume batzuei laguntzeko helburuarekin egin dute", adierazi dute.

Kanpainaren leloa da "Entzunez gero, ikusiko duzu. Soilik adi dagoen gizarte batek antzeman dezake indarkeria ezkutuena", eta gizartea sentsibilizatu nahi du eta enpatia areagotu adineko emakumeen aurkako indarkeriaren inguruan, bereziki kontuan hartuta haien egoeraren zaurgarritasuna, besteak beste, biktimak ikusezinak direlako. Kanpainak, zentzu horretan, lagundu nahi du kasuak detektatzen eta emakume nagusiei errazten baliabide espezializatuetara gerturatzea.

Kanpainaren helburua da erakustea genero-indarkeria hainbat adinetako emakumek jasaten dutela (ez bakarrik emakume gazteek edo adin ertainekoek, komunikabideek eta kanpaina instituzionalek nagusiki nabarmendu izan duten bezala), baita adineko emakumeak ere.

Eta horrekin batera, adineko emakumeen aurkako indarkeriak bere berezitasunak dituela: ikusezintasuna; sistema patriarkal batean sozializatuak izana, non senarrei baimena eskatu behar zieten atzerrira joateko, lan egiteko edo banketxean kontu korronte bat irekitzeko; kasu gehienetan, autonomia ekonomikorik eza; euren garaiko gizarteak genero-indarkeria aintzat hartu ez izana, bizitza oso bat beste pertsonak zaintzen egon izana… Adineko emakumeak askotarikoak izan arren eta guztiak profil berekoak ez izan arren, adinak euren zaurgarritasunean eragina du

Kanpaina azaroaren 9a eta 25a bitartean hedatuko da telebista, irrati, medio off-line eta online eta sare sozialen bidez.