EAEn indarrean dauden neurriak zorroztuko dituzten ala ez aztertuko du gaur LABIk

LABI Euskadiko Babes Zibileko Planaren aholku batzordearen ostegun arratsaldeko batzarrean hartutako erabakien berri emango du Gotzone Sagardui Osasun sailburuak, hitzordua bukatutakoan. Iñigo Urkullu lehendakariak zuzendutako bilera horretan, COVID-19aren pandemiari aurre egiteko hartutako neurriek izandako emaitzak aztertuko dituzte. Esan bezala, Sagarduiren agerraldia bilera bukatutakoan hasiko da, eta eitb.eus-en zuzenean emango dugu.

Aurreikusitakoaren arabera, Euskal Autonomia Erkidegoan pandemiak izan duen bilakaeraz ere jardungo dute arratsaldeko saioan.

Sagarduiren hitzetan, ez dute aldaketa garrantzitsurik aurreikusi, indarrean dauden neurriei eustea salbu.

Legebiltzarreko ohiko saiora iristean, sailburuak berretsi du datuek "hobekuntza txiki bat" izan dutela, aurreko asteetakoekin alderatuta. Halere, argi utzi du kutsatze maila oraindik ere handia dela, eta ezin garela lasaitu.

Gauzak horrela, Sagarduik esan du birusaren bilakaerak hobera egiten badu eta aurki txertoa heltzen bada, gerta litekeela COVID-19a "eragozpen gisa" ikustea, "gaixotasun moduan barik".

Zupiria, neurri murriztaileei eustearen alde

Bingen Zupiria Jaurlaritzako bozeramaileak ostegun honetan baieztatu duenez, egungo egoera epidemiologikoa kontuan izanda, "zentzuzkoena litzateke indarrean dauden neurriak abenduko zubia bukatu arte luzatzea".

Bizkaia Irratian egin dioten elkarrizketan, Zupiriak nabarmendu du egoera ez dela ona, "hasteko, kutsatzeen mailak askoz txikiagoa izan beharko lukeelako". Azken 14 eguneko datuek erakusten dute 100.000 biztanleko 800 kasu inguru daudela Euskadin, eta "egoera ontzat emateko 50-60 kasu egon beharko lirateke".

Era berean, onartu du ospitaletan eta zainketa intentsiboetako unitateetan "presio handia" dagoela. "Jende asko dago egoera larrian, eta horrek beste gaixotasun batzuekin lotutako zainketak eta ebakuntzak atzeratzea ekarri du. Beraz, egoera larria da", azaldu du.

"800 kutsatzetik 50era jaisteko, bide luzea dugu aurretik, eta horregatik erabaki dugu neurri zorrotzak hartzea. Lehendakariak iragarri zuen 15 egunetan berraztertuko zituztela neurri horiek, baina hilabeterako zirela. Hilabete abenduaren 5ean beteko da, eta, gauzak dauden moduan egonda, zentzuzkoena litzateke zubia bukatu arte neurririk ez malgutzea", adierazi du.

Gabonak

Gabonei buruz azpimarratu du oraindik ez dutela erabakirik hartu, "baina guztiok egin beharko genuke horren gaineko gogoeta, egoerak etengabeko tentsioa dakarrelako".

Bere egoera pertsonala hizpide hartuta, Zupiriak gaineratu du familiarekin, lankideekin eta lagunekin elkartu ohi dela gabon festetan, nahiz eta aurten ez duen horrelakorik egingo.

"Gure familian erabaki dugu ez garela batuko, etxekoak soilik, eta horrenbestez, ez dugula familia bisitatuko. Abenduaren 24ko eta 31ko poteoak ere beste baterako utziko ditugu, eta ez dugu lagunarteko bazkari edo afaririk antolatuko. Gure erabaki pertsonala da", azaldu du.

Txertoa

Bukatzeko, gogora ekarri du Osakidetzako eta Osasun Saileko arduradunak Estatuko osasun arduradunekin harremanetan daudela, txertoaren prozesua antolatzeko: "non eta nola banatuko den, edo non eta nola gordeko den".

Edozein modutan, "oraindik ez dago gure esku, ezta Estatuaren edo Europaren esku ere. Ez dago txertorik, hortaz, itxaroteko, antolatzeko eta prestatzeko unea da orain, betiere aintzat hartuta bide luzea dugula egiteko, eta zuhurtziaz jokatu behar dugula egoerari aurre egin ahal izateko", amaitu du.