Gertakaria
Gorde
Kendu nire zerrendatik

Jendea labana batekin mehatxatzen ari zen gizon bat hil du Poliziak tiroz Madrilen

Gertakaria goizean jazo da Villaverde barrutiko osasun zentro batetik gertu. Agenteek hainbat aldiz egin diote tiro, gehienak bularraldean.
Bala batek utzitako zuloa inguruan aparkatuta zegoen auto batean.
Bala batek utzitako zuloa inguruan aparkatuta zegoen auto batean. Argazkia: EFE

Oinezkoak eta gidariak labana batekin mehatxatzen ari zen gizon bat hil du gaur Espainiako Poliziak tiroz, Villaverde barrutian (Madril), Poliziaren Buruzagitza Nagusiko bozeramaile batek jakinarazi duenez.

Gertakariak 10:00ak aldera jazo dira Benimamet kaleko 24. zenbakiaren parean, San Cristobal de los Angeles auzoaren osasun zentrotik gertu. Hainbat pertsonak larrialdietara deitu dute esanez gizon bat sukaldeko aizto handi batekin jendea mehatxatzen ari zela.

Polizia bertaratu denean, gizona "agente bati oldartu zaio eta zauriak egin dizkio esku batean", zehaztu du iturriak. Segidan, agenteak tiro egin dio hanketako batean, eta gizonak "mehatxuak egiten jarraitzen zuenez", beste agentek batzuek ere tiro egin diote. Suzko armarekin egindako gutxienez lau zauri egin dizkiote, gehienak bularraldean. 

Samur-Babes Zibileko osasun langileak heldu direnerako, gizona larri zaurituta zegoen, bihotz-biriketako geldialdiarekin. Suspertzen saiatu diren arren, bertan hil da.

30-40 urteko gizonezkoa da eraildakoa, agintaritzaren kontrako atentatuagatik aurrekariak zituena. Auzokideen esanetan, inguruan ibiltzen zen etxegabe bat zen, buruko arazoren bat zuena. 

Polizia Zientifikoaren agenteak gertakariak izan diren lekura joan dira probak biltzera. Osasun zentroa itxita egon da tarte batez, segurtasun neurri gisa.

Zure interesekoa izan daiteke

Gehiago ikusi
Publizitatea
X