streaming plataformak
Gorde
Kendu nire zerrendatik

Pantailak Euskaraz ekimena aurkeztuko dute astelehen honetan Eusko Legebitzarrean

Euskarak ikus-entzunezkoetan eta 'streaming' bidezko plataformetan duen presentzia izango dute mintzagai, eta bilera zuzenean jarraitzeko aukera izango da.
Pantailak Euskaraz ekimenaren aurkezpena, 2021eko ekainean. Artxiboko argazkia: Pantailak Euskaraz

Pantailak Euskaraz ekimena aurkeztuko dute astelehen honetan, 16:00etatik aurrera, Eusko Legebiltzarreko Kultura, Euskara eta Kirol Batzordearen bileran. Eusko Legebiltzarreko streaming zerbitzuaren bidez jarraitu ahal izango da.

2021eko ekainean sortu zen Pantailak Euskaraz mugimendua, euskarak ikus-entzunezkoetan duen "egoera larriarekin" kezkatuta zeuden hainbat herri ekimen eta eragilek bat eginda: Disney+euskaraz, Netflix euskaraz, Zinemak euskaraz, Bikoiztaile Euskaldunen Elkartea, Tinko Euskara elkartea eta Game Erauntsia elkartea. 

Abiatutako kanpaina ezberdinen artean, ia 30.000 sinadura bildu dituzte streaming plataformak, zinemak, eta Twitch sortzaile plataforma euskaraz egon daitezen eskatuz, eta aldarrikapen taula bat ere kaleratu dute, hurrengo eskaerekin:

1) Euskarazko ikus-entzunezkoen sektoreko finantzaketa publikoa handitzea

2) EITB indartzea eta euskararen normalkuntzarako tresna bihurtzea

3) Euskarazko streaming plataforma sendo bat sortzea

4) Streaming plataformetan euskararen presentzia legez bermatzea

5) Zinemaren lege propioak sortzea

6) Bideojokoetan eta sortzaile plataformetan, euskararen presentzia bermatu eta sustatzea

7) Ikus-entzunezkoen lege propioak sortzea

8) Ikus-entzunezkoen Kontseilu propioa sortzea, lurralde-administrazio bakoitzean

9) Espainiar eta Frantziar kate publikoek edukiak euskaraz eskaintzea

10) Koordinazio-organoa sortzea, hiru lurralde administrazioetako ordezkariz osatua.

Gizartearen eskari hauek bete daitezela eta euskaldunen eskubideak bermatu daitezen urratsak emateko eskaera luzatu diete, era berean, erakunde eta ordezkari publikoei, eta bihar eskakizun horiek eramango dituzte Legebiltzarrera.

 

Albiste gehiago gizartea

18:00 - 20:00
ZUZENEAN
Duela  min.

Segurtasun sailburuordeak elkartasuna agertu die ertzainei, eta Ordizian gertatutakoa "oso larria eta onartezina" dela salatu du

Ricardo Ituarte Eusko Jaurlaritzako Segurtasun sailburuordeak azaldu duenez, larrien dagoen ertzaina Gurutzetako Ospitalera eraman dute, ebakuntza egitera, masailezurra eta lepauztaia hautsita baititu. “Gertatutakoa onartezina eta oso larria da. Ikerketa amaieraraino joango da eraso latz honen erantzukizun guztiak argitzeko. Pertsona gehiago inplikatuta dauden jakin nahi dugu”, esan du Ituartek, eta elkartasuna agertu die erasoa jasan duten ertzainen senideei eta Ordizian izandako ertzainei.

Gehiago kargatu