Beasain eta Bergara arteko A-636 autobiako bidesaria urtarrilaren 18an sartuko da indarrean

Beasain eta Bergara arteko A-636 autobiako bidesaria 2022ko urtarrilaren 18an sartuko da indarrean. Gipuzkoako Batzar Nagusiek onartutako azaroaren 6ko 4/2020 Foru Arauren arabera, motordun ibilgailu guztiei eragingo die, motozikletei izan ezik.

Gipuzkoako Foru Aldundiak azaldu duenez, arauaren helburua da azpiegituraren erabiltzaile orok "ahalmen handiko errepideen eraikuntza-, mantentze- eta kudeaketa-gastu handietan laguntzea".

Data horren hurbiltasuna dela eta, foru erakundeak herritarrei gogorarazi die aurrez aurreko informaziorako guneak, Bidegirekin lankidetzan Goierrin, Urola Garaian eta Debagoienean ezarritakoak, urtarrilean ere zabalik egongo direla; erabiltzaileen zalantzak argitzeko eta Abiatu teleordainketarako gailua eskuratzeko izapideak errazteko.

Gune horiek Ezkio-Itsason, Ormaiztegin, Zumarragan, Beasainen, Legazpin, Bergaran, Urretxun eta Antzuolan ezarriko dituzte. Horietan guztietan eskainiko dute prezioen, deskontuen eta eskaera-orrien inguruko informazioa. Udazkenetik martxan dirauen plangintza horren helburua da erabiltzaileek Abiatu gailua era presentzialean eskatu ahal izatea, edo euren ibilgailuaren matrikula banku-txartel bati lotu ahal izatea, autobiaren erabilerarako arau berria indarrean sartu aurretik.