Gorenak ere ez du genero larrigarririk ikusi Niebla auzian eta zigorra berretsi du
Auzitegi Gorenak, aurrez EAEko Auzitegi Nagusiak egin bezala, baztertu egin du genero larrigarria Asier Nieblaren auzian eta EAEko auzitegiak ezarritako zigorra berretsi du: 11 urte eta erdi bete beharko ditu gazte urnietarraren erasotzaile eta hiltzaileak.
Epaitutako gertakariak 2018ko abuztuaren 12an jazo ziren, Donostiako Aste Nagusiaren lehen egunean. 05:00ak aldera, zigortutako gizonak neska-lagun ohia ikusi zuen kalean Asier Nieblarekin hizketan. Epaiaren arabera, "korrika hasi zen, eta abiada hartuta, ukabilkada gogorra eman zion gazteari". Niebla lurra jausi zen eta buruan kolpea hartu zuen.
Donostiako Ospitalean urgentziazko ebakuntza egin zioten Urnietako bizilagunari, baina koma egoeran geratu zen zainketa intentsiboetako unitatean. Beste bi ebakuntza egin zizkioten, eta azkenean erasoa pairatu eta ia bi hilabetera, urriaren 11n, hil zen.
Gipuzkoako Lurralde Auzitegiak epaitu zuen aurrena kasua, herri epaimahaiarekin. Erasotzaileari 12 urteko eta 11 hilabeteko zigorra ezarri zioten. Dena dela, defentsak helegitea aurkeztu zuen EAEko Auzitegi Nagusian, eta horrek genero astungarria baztertu eta 11 urte eta erdiko kartzela zigorra ezarri zion. Argudiatu zuenez, Nieblarekin hizketan ari zen emakumea ez zen epaitutako gertakarien biktima izan, eta beraz, ezin zen genero astungarria aplikatu.
Erabaki horren kontra egin zuten defentsak, akusazio partikularrak eta Urnietako Udalak (herri akusazioa), baina helegite guztiak baztertu ditu orain Gorenak.
Zure interesekoa izan daiteke
Lesakako Zubigaineko dantza San Fermin eguna ospatzeko
Lesakako dantzariak Onin zubiko petrila igo dira ohiko Zubigaineko dantza egiteko. Dozenaka ikusleren aurrean, San Fermin eguna ospatu dute herrian.
1.500 ikasle gehiagok jaso ahal izango dute unibertsitate-beka datorren ikasturtean, Jaurlaritzak baldintzak malgutu ondotik
Besteak beste, zailtasunak izan arren orain arte errenta-muga gainditzen zuten familietako ikasleek jaso ahal izango dute beka. Gainera, desplazamendu-laguntzak jasotzeko ez da derrigorrezkoa izango ikasketak Euskal Autonomia Erkidegoan egitea, eta baldintza akademikoak ere malgutuko dira; zenbait kasutan 5eko nota nahikoa izango da laguntza jasotzeko.
Etxebizitza da arazo nagusia Bizkaiko herritarrentzat, baita enplegua eta segurtasunik eza ere
Bizkaiko ekonomiaren egoera nahiko ona dela uste dute % 45ek, baina 2027an dezente okerragoa izango dela uste dute % 27k. Arlo politikoari dagokionez, EAJ da begikotasun handiena pizten duen alderdia (% 38), eta haren atzetik daude EH Bildu (% 36) eta PSE-EE (% 14).
Iruñeak bere egun handia ospatu du gaur San Ferminen omenezko prozesioarekin
Zuriz eta gorriz jantzitako milaka iruindarrek Iruñeko kaleak bete dituzte astearte honetan, uztailak 7, jaietako egun handian, San Fermin alde zaharretik igarotzean santuaren omenezko prozesio tradizionalean babesteko. Aurten, tenperatura altuek eragindako alerten ondorioz, prozesioaren ibilbidea aldatu egin da.
Gipuzkoako Foru Aldundiak enplegu publikoko 281 plaza deitu ditu 18 hautaketa-prozesu berritan
Azterketak 2027ko urtarrilaren 11tik aurrera egingo dira, eta salbuespen bakarra egongo da: kanpainetan laguntzeko erdi-mailako teknikari lanpostuetarako azterketan, hain zuzen ere. Azterketa hori abenduaren 1etik aurrera deitu ahal izango da.
Bi pertsona atxilotu dituzte sexu-erasoak egitea egotzita sanferminetako lehen egunean
Agiri baten bidez, Iruñeko Udalak bi atxiloketak baieztatu ditu jaietako lehen 24 orduak igarota egin duen balantzean.
ELAk iragarri du sektore-hitzarmenetako 27 negoziaziotan euskara soilik erabiliko duela
Sindikatuak adierazi duenez, aztertutako ia 1.500 hitzarmenen artean, % 17k baino ez dituzte "hizkuntza eskubideak bermatzeko" neurriak jasotzen.
San Fermin egun handia gogotik ospatzen ari dira Iruñean
Sanferminetako egunik esanguratsuena bizi du Iruñeak: jaietako ekitaldirik jendetsuenak eta tradizionalenak biltzen ditu egitarauak. Lehenengo entzierroa, patroiaren omenezko prozesioa, su artifizialak eta kontzertuak dira San Fermin egun handiko hitzordu garrantzitsuenak.
Garbitzaileak buru-belarri aritu dira ibilbidea garbitzen sanferminetako lehen gauaren ondoren
Egunero, 253-317 pertsonak osatzen dute garbiketa, brigadetan banatuta, eta 80 edukiontzi gorri, 800 eta 1.000 litro artekoak, eta 120 litroko 800 paperontzi ere jarri dituzte.
Fuente Ymbroko zezenek entzierro azkarra egin dute, adarkadarik gabekoa
2 minutu eta 20 segundo iraun du aurtengo sanferminetako lehen entzierroak. Guztira, bost pertsona zauritu dira eta horietako hiru ospitaleratu dituzte, denak kolpeengatik.