Bueltan da Auzolandegiak programa, eta berritasunez betea dator

Bi urteko geldialdiaren ostean, uda honetan, Eusko Jaurlaritzako Berdintasun, Justizia eta Gizarte Politiketako Sailaren Gazteria Zuzendaritzaren Auzolandegien programa itzuliko da. Programa horrek hainbat jatorritako gazteek 15 egunez gizarte-proiekzioko lan batean borondatez eta eskuzabaltasunez parte hartzea sustatzen du.

2022an 12 boluntariotza auzolandegi antolatu ditu Gazteria Zuzendaritzak eta 295 plaza eskainiko dira guztira. Berrikuntza nagusietako bat 14 eta 17 urte bitarteko adingabeek programan parte hartu ahal izango dutela lehen aldiz, izan ere Gorlizko (Bizkaiko Foru Aldundiaren laguntzarekin), eta Arraia-Maeztuko auzolandegiak adin horretako lagunentzat izango dira. 

Beste bi auzolandegi nazioartekoak izango dira -Muxika eta Murueta-, eta Euskadiko eta beste herrialde batzuetako gazteek hartuko dute parte.

Gainerako auzolandegietan, hau da, Laudio, Sopuerta, Lekeitio, Bilbo, Alonsotegi, Erandio, Lemoa eta Bergaran, Euskadiko eta beste erkidego batzuetako gazteek hartuko dute parte.

Auzolandegiak programaren beste berrikuntza bat Akitania Berria-Euskadi-Nafarroa Euro-erregioaren esparruko lehen auzolandegia da. Hiru eskualdeetako 25 gaztek parte hartuko dute abuztuaren hasieran Lekarotzen (Nafarroa) egingo den boluntariotza-auzolandegi batean.

Horietan guztietan 18 eta 30 urte bitarteko pertsonek parte hartu ahal izango dute, eta auzolandegi gehienetan dibertsitate funtzionala duten pertsonentzako plazak egongo dira.

Auzolandegietan aurrez izena emateko epea apirilaren 1etik 26ra bitartean egongo da zabalik, eta auzolandegia aukeratzeko zozketa 27an egingo da. Izena emateko txandak maiatzaren 2an argitaratuko dira gutxi gorabehera, eta izena emateko/hautatzeko epea maiatzaren 5etik aurrera egingo da.

Aurten, berriz ere, aurrez izena emateko eta izena emateko prozesua bitarteko elektronikoen bidez egingo da. Hori dela eta, Gazteria Zuzendaritzak BakQ txartela (edo identifikazio elektronikorako beste edozein bide) eskuratzea gomendatu du. Aurrekotan bezala, aurten ere www.gazteaukera.euskadi.eus webgunearen bidez egin ahal izango da prozesua. 

Eusko Jaurlaritzako Berdintasun, Justizia eta Gizarte Politiketako sailburu Beatriz Artolazabalek nabarmendu du 2022an Gazteen Europako Urtea ospatzearekin batera, Eusko Jaurlaritza jarduera berriak sustatzen ari dela gazte-kolektiboari begira, gazteen eta helduen arteko topagune berriak sortzeko beharrari erantzuteko.

Aurkezpenean izan da Gorlizko alkate Nagore Utxupi ere eta hark zehaztu duenez, Gorlizko auzolandegian Urezarantza inguruetako zubiaren berreraikuntza eta harrizko garbitegia berreskuratzea izango dute zeregin nagusia. Horrela, taldea osatzen dutenek gure herria sakon ezagutuko dute eta "inplikatu" egingo dira ingurunearen zaintzan.