21 urteko mutil bat hil da Nafarroan, nitazenoa kontsumitu ondoren

Nafarroako Unibertsitate Ospitaleko (HUN) Toxikologiako lantaldeak egindako ikerketak ondorioztatu du 2024an Nafarroan hil zen 21 urteko gazte baten heriotzaren atzean nitazenoen kontsumoa egon zela. Opioide sintetiko hori fentaniloa eta heroina baino 40 aldiz gogorragoa da, adituen arabera.

Euskal Herrian eta Espainiako Estatuan nitazenoak eragindako lehen heriotza litzateke. Nolanahi ere, Nafarroako Gobernuko Osasun Departamentuak ez du kasua baieztatu oraindik, gazteari egindako lehen analisiek negatibo eman baitzuten nitazenoaren kontsumoan. 

Kasua aztertu duen lantaldeak ospitaleko barne argitalpen batean eman du kasuaren berri, 'Nitazenoak: gero eta hurbilago dagoen mehatxua' goiburupean. Bertan azaltzen denez, 2024ko uztailaren 28an 21 urteko gazte bat artatu zuten Larrialdietarako Zerbitzuan, konorterik gabe eta arnasteko arazo larriekin. Aurrekariak zituen, era askotako drogak kontsumitzeagatik.

Hiru dosi naloxona —opioideen efektuei aurre egiteko botika bat da— emanda lortu zuten osasun langileek gaztearen arnasketa bere onera ekartzea eta egonkortzea. Egindako aurreneko analisiek, opioideetan negatibo eman zuten, eta anfetaminan, metanfetaminan, cannabisean eta kokainan, positibo. 

Egun horretan bertan, ospitaleratu eta lau ordu geroago, gazteak sendagiria eskatu zuen, eta handik bost egunera, hilda aurkitu zuten, etxean. Analisiek baieztatu zuten drogak kontsumitu zituela. 

Azterlanean, adituek nitazenoen kontsumoaren ondorioetan jarri dute azpimarra. Arnasbideetako depresio akutua eta iraunkorra eragiten dute, fentaniloak baino akutuagoa, eta heriotza-tasa oso altua da.