Haserrea Gernikan, Lointekeko kirol zuzendariak adingabe bati ustez egindako sexu erasoak direla eta

Gernikako herriak eta saskibaloiaren munduak ozen salatu nahi izan dituzte Mario Lopez Lointek Gernikako entrenatzaile ohi eta orain arte kirol zuzendaria izan denak adingabe bati ustez egindako sexu erasoak.

Komunikabideetan egindako adierazpenetan zein kalean, bi protesta izan dira gaur Gernikan: 16:00etan elkarretaratzea Allende Salazar eskolan, erasoak hasi ziren tokian, eta 19:00etatik aurrera, manifestazioa herrian zehar.

El Pais egunkariak atzo jakinarazi zuenez, egun 33 urte dituen emakumeak 2022ko ekainean salatu zituen erasoak. Azaldu zuenez, 1998an hasi ziren erasoak, biktimak 13 urte zituenean, eta Mario Lopezek Allende Salazar ikastetxe publikoko taldea entrenatzen zuenean. Hiru urtez luzatu zen egoera, biak gero Lointek Gernika taldeko kide ziren garaian.

Arratsaldean, Gernikan elkarretaratzea egin dute Allende Salazar ikastetxearen atarian. Bost ikastetxeetako ordezkariak bildu dira biktimari elkartasuna eta babesa adierazteko, "Haurren kontrako erasorik ez" zioen pankarta baten pean.

Allende Salazar ikastetxeko zuzendari Aritz Zearrak adierazi duenez, "albistea oso gogorra da, eta lehentasun bakarra ikasleak babestea da". Gogor salatu du adingabeei egindako edozein eraso, eta babes osoa eman dio biktimari. Lopezek ikastetxeko taldeko saskibaloi entrenatzailea izan zenean gertatutakoa argitzeko, ikastetxea "edozein eskakizunetarako irekita" dagoela ere adierazi du.

Ikastetxeko Ikasleen Guraso Elkarteak ere irmoki gaitzetsi ditu duela hogei urte familien elkarteak antolatzen zituen eskolaz kanpoko jardueretan ustez gertatutakoak.

Halaber, 19:00etan herriko sare feministak deitutako manifestazioan parte hartzeko deia egin dute. "Guk sinesten dizugu" lelopean,  2.800 pertsona inguru bildu dira manifestazioan.

Protesta Gernika erdigunetik abiatu da eta Maloste kiroldegian amaitu da. Mario Lopez "pederasta" eta "bortxatzailea" dela zioten pintaketak agertu diren tokian.

Gernikako mugimendu feministak Lointek Gernikari kasua ezagutzea eta orain arte ezer ez egitea leporatu dio

Gernikako kolektibo feministak ziurtatu du Lointek Gernika klubak uztailetik zekiela Mario Lopezen aurkako salaketa bat zegoela, adingabe bati sexu-erasoa egitea egotzita, eta orduan eskatu zutela entrenatzaile gisa baztertzeko.

"Zur eta lur geratu gara, hitzik gabe" klubaren erreakzioagatik, izan ere, "lau aldiz bildu gara eurekin gai honi buruz hitz egiteko, eta joan den uztailaren 3tik deiak eta mezuak izan ditugu", salatu dute ordezkari batek, klubak ofizialki atzo jakin zuela esan eta gero.

"Campusa hurrengo egunean amaitzen zela esan ziguten, eta pertsona horrek ez zuela haurrekin lan egingo, lasai egoteko", eta Emakumezkoen Endesa Ligako taldearen entrenatzaile gisa jarraitzen zuela, "bera ordezkatzeko eta bere kategoriarekin beste bat aurkitzeko arazoak zeudelako", azaldu dute.

Manifestazioaren aurretik egindako adierazpenetan, talde feministaren bozeramaileak esan duenez, "erasotzaile batek bi hamarkadatan bizi izan duen inpunitatea eta taldeak erasotzailearekin izan duen konplizitatea salatu nahi dugu".

Lointek Gernikak Mario Lopez kaleratzea erabaki du baina kasua ez zuela ezagutzen defendatzen jarraitzen du

Lointek Gernika Saskibaloi taldeko Zuzendaritza Batzordeak atzo jakinarazi zuen Mario Lopez, taldeko entrenatzaile ohia eta egun kirol zuzendaria zena, klubetik "apartatuta" geratu zela Espainiako Saskibaloi Federazioaren eskakizuna jaso ondoren.

Kasuak izandako oihartzuna ikusita, ezohiko bilkura egin dute gaur arratsaldean eta bilera horretan, Lopez "funtzio guztietatik kentzea" erabaki dute. Hori bai, klubak jarraitzen du esaten ez zekiela teknikariaren aurkako prozesu penalik zegoenik irekita, zeozer "txikiagoa" baizik.

ETBk egindako elkarrizketa batean, Juan Carlos Soto del Castillo Lointek Gernika taldeko abokatuak aitortu du klubak egindakoa "ez dela nahikoa" izan. Soto del Castillok azaldu duenez, "entrenatzaileak emandako informazioa baino ez zuten" azarora arte. Entrenatzaileak esan omen zien duela urte askoko kontu bategatik "jazarpenagatik" salatu zuela norbaitek.

Angie Bjorklund Lointekeko jokalari ohiak txio bat idatzi du taldea auzi honegatik utzi zuela iradokiz

Angie Bjorklund Lointekeko jokalari ohiak X sare sozialean (lehen twitter) argitaratutako argitalpen batean iradoki du honegatik utz zuela joan den urrian Lointek taldea. "Zergatik utzi nuen Gernika", idatzi du jokalariak atzo El País egunkariak argitaratutako artikuluaren pantaila-irudi bat erantsiz.

Bien bitartean, Euskadiko eta Bizkaiko saskibaloi-federazioek oharra kaleratu dute "kirol-arloan gertatzen diren sexu-abusuen kontra" daudela berretsiz eta horiek jasan dituzten "pertsona guztiei babesa eta elkartasuna" adieraziz.