18 urteko zigorra eskatu dute Gasteizen etxerik gabeko bi pertsonari aurpegia erre zieten bi gizonentzat

Gasteizen etxerik gabeko bi pertsonari aurpegia erre zieten bi gizonen aurkako epaiketa otsailaren 13an hasiko da Arabako Auzitegian. Fiskaltzak 18 urteko kartzela-zigorra eskatu du horietako bakoitzarentatz.

Fiskaltzaren ustez, gertaerak giza hilketaren bi delitu dira, saiakuntza-graduan, eta nagusitasun-abusuaren astungarriarekin. Horregatik, bederatzi urteko espetxe zigorra eskatzen du auzipetu bakoitzarentzat delitu bakoitzagatik.

Erasoak 2019ko urriaren 16an gertatu ziren. Lehenengoa 14:30ean eta bigarrena 15:08an.

Lehen erasoan, bi akusatuak 57 urteko gizon batengana hurbildu ziren, eta "bere osotasun fisikoa kaltetzeko asmoz, eta bere bizitzarekin amaitu zezaketela jakinda", sprayaren pintura urdina aurpegira bota zioten, piztutako metxeroa hurbiltzearekin batera.

Ekintza horrek sugarra eragin zuen biktimaren aurpegian eta buruan, eta une horretan, bi auzipetuek esprai potea zuzendu zuten "etxerik gabekoaren" aurpegiaren kontra.

Bi erasotzaileak, biktimaren egoera gorabehera, joan egin ziren. Biktimak hirugarren mailako erredurak izan zituen aurpegian, lepoaren eta eskuaren aurrealdean, eta glotis edema garrantzitsua.

Gurutzetako erredura handien unitatera eraman zuten, eta han sendatu eta alta eman zioten sei egun geroago, urriaren 22an.

Fiskaltzak uste du glotis edema garrantzitsu bat egon zela, tratamendu egokirik gabe heriotza eragin zezakeena.

Bi akusatuek oinez jarraitu zuten eta 60 urteko gizon bat topatu zuten joko-areto baten sarreran eserita. Han, gizon horri eraso egin, lurrean etzan eta bi ostiko eman zizkioten buruan.

Auzipetuetako batek gizona immobilizatzen zuen bitartean, besteak sprayarekin aurpegia busti zion, motxilatik metxeroa atera, piztu eta aurpegira hurbildu zuen, baina sugarra sortzea lortu gabe.

Hala eta guztiz ere, metxeroa hartu eta aurpegira hurbildu zuen berriro, aurpegia pintura-ontziaz bustitzen zion bitartean. Oraingoan bai, sugarra eragin zuen aurpegian, eta, gainera, erasotzaileak bost segundoz eutsi zion espraiari biktimaren aurpegiaren kontra.

Azkenean, bi auzipetuek lurrean utzi zuten biktima, kea belarri batetik ateratzen zitzaion bitartean.

Bigarren biktima horrek bigarren mailako erredurak izan zituen aurpegian eta lepoan, aire-bideetako hantura kea arnasteagatik eta hematoma bat garezurrean. Santiago ospitalera eraman zuten eta 22an alta eman zioten.

Lehen kasuan bezala, Fiskaltzak uste du glotis edema garrantzitsu bat egon zela, tratamendu egokirik gabe heriotza eragin zezakeena.

Udaltzaingoak minutu batzuk geroago atxilotu zituen bi erasotzaileak, 15:15ean.

Behin-behineko espetxealdian sartu zituzten, eta ia bi hilabetez egon ziren bertan, 2019ko abenduaren 13ra arte, orduan behin-behineko askatasuna agindu baitzuten.

Bi biktimetako bat 2020ko azaroan hil zen, erasoarekin zerikusirik ez zuten arrazoiengatik.